Ahmet Turk di mîhrîcana Nisêbînê de got ku gelê Kurd ji bo pêşeroja xwe xebatên zêrîn kirine û ji bo aştiyek bi rûmet divê îro dengê xwe bilind bike.
Li navçeya Nisêbîn a Mêrdînê Mîhrîcana Çand û Hunerê ku ji aliyê Şaredariya Nisêbînê û Sanatça Organîzasyonê ve piştî 9 salan hatibû lidarxistin, di roja 4emîn de bi dawî bû. Parlamentera DEM Partiyê ya Mêrdînê Berîtan Guneş Altin, Hevşaredarê Bajarê Mezin ê Mêrdînê Ahmet Turk, hevşaredarên Nisêbînê û bi hezaran welatî tevlî konsera roja dawiyê bûn. Di destpêka bernameyê de hevşaredarên Nisêbînê axaftin kirin û dan zanîn ku çand û hunera Kurdî ji bo wan gelekî girîng e.
Ziman weke nan û av girîng e
Piştî axaftina hevşaredaran Hevşaredarê Bajarê Mezin ê Mêrdînê Ahmet Turk da zanîn ku ziman ji bo gelê Kurd wek av û nan girîng e û wiha axivî: “Divê em bi şev û roj li zimanê xwe, li çanda xwe xwedî derkevin. Dewlet bi pişaftinê naxwaze zimanê me pêş bikeve. Kêmasiyên me jî di aliyê pişaftinê hene ji ber ku êdî gelek malbat bi zarokên xwe re tirkî diaxivin.”
Birêz Ocalan projeyek hêja daniye
Ahmet Turk derbarê Pêvajoya Aştî û Civaka Demokratîk de jî got ku Rêberê Gelê Kurd Birêz Ocalan projeyeke gelekî hêja daye destpêkirin û axaftina xwe wiha bi dawî kir: “Gelê me gelekî ked da, gelek berdel dan, kedeke zêrîn hat dayîn û divê îro ji bo aştiyek bi rûmet gelê me dengê xwe bilind bike.”
Piştî axaftina Ahmet Turk bi hezaran kesên li Qada Newrozê ya Berê kom bûne li ber stranên hunermend Rojda govend gerandin.
