TJAyê starta rêzeçalakiyên xwe yên 8ê Adarê li ber Keleha Wanê da û wiha got: “Ji bo me, ev 8ê Adarê îlankirina serkeftinê ya ji bo rengê jinan a li dijî tarîtiya mêraniyê û ji bo hişmendiya azadiyê li dijî zincîrên koletiyê ye.”
Tevgera Jinên Azad (TJA), starta rêzeçalakiyên xwe ya ji bo 8ê Adarê li Kelaha Wanê da. Jin li ber Parka Newrozê kom bûn û heta kêleka Keleha Wanê bi dirûşmeyan meşiyan. Piştî meşê daxuyanî hat dayîn û di daxuyaniyê de pankarta “Em bi berxwedanê azad dibin û civaka demokratîk dihonin” hat vekirin û dirûşma “Jin Jiyan Azadî” hat berzkirin. Jinan ji bo balê bikşînin ser hevgirtina jinan, porên xwe honandin û govend gerandin. Gelek jin tev li çalakiyê bûn.
‘8ê Adarê îlankirina serkeftinê li dijî zincîrên koletiyê ye’
Aktivîsta TJAyê Arîfe Aslanê metna daxuyaniyê xwend û diyar kir ku ew bi ruhê berxwederiyê civaka demokratîk ava dikin û azad dibin. Arîfe Aslanê destnîşan kir ku meşaleya berxwedanê ya ku ji hêla jinên karkerên tekstîlê hatiye vêxistin, îro li axa kevnar a Mezopotamyayê bi şarezahiya jinê ya bi hezar salan ve vediguherînin meşa azadiyê. Arîfe Aslanê wiha got: “Dema ku em 8ê Adara 2026an pêşwazî dikin, em ne tenê ji bo rojekê derdikevin qadan, lê di heman demê de bîranînek sedsalî ya li dijî kuştina jinan, îradeyeke bê dawî ya ji bo azadiya civakî û soza jiyanek nû hembêz dikin. Ji bo me, ev 8ê Adarê îlankirina serkeftinê ya ji bo rengê jinan li dijî tarîtiya mêraniyê û ji bo hişmendiya azadiyê a li dijî zincîrên koletiyê ye.”
‘Banga Ocalan wekî şefeqa demokratîk li ber me radiweste’
Arîfe Aslanê da zanîn ku cîhan di nav lepên qeyranên binyadî yên ku ji hêla modernîteya kapîtalîst û qeyrana “şerê cîhanê yê sêyemîn” ve hatine afirandin de ye û wiha berdewam kir: “Bêguman bedela herî giran a vê qeyranê ji hêla jinan ve tê dayîn û li hemberî vê ku vê tarîtiyê ji holê rake; Perspektîfa dîrokî ya ku Rêberê Gelan Abdullah Ocalan di 27ê Sibatê de pêşkêş kir, wekî şefeqa demokratîk a herî berbiçav li ber me radiweste. Ev îradeya çareseriyê, ku li dijî pergala tecrîdê hatiye raberkirin, îspat dike ku aştî tenê bi azadiya jinan ve pêkan e. Ji ber vê yekê, azadiya fîzîkî ya Birêz Abdullah Ocalan mifteyek girîng e ji bo mayîndehiya aştiya civakî û avakirina pêşerojek demokratîk.”
‘Banga 27ê Sibatê di Şoreşa Jinan a Rojava de bûye rastiyek’
Di berdewamiyê de Arîfe Aslanê bal kişand ser berxwedana Rojava û ev tişt li axaftina xwe zêde kir: “Ev îradeya çareseriyê, ku di 27ê Sibatê de pêk hat, îro di Şoreşa Jinan a Rojava de bûye rastiyek zindî. Rojava ne tenê cihê berxwedanê ye, di heman demê de qada azadiyê ye a ku ji aliyê jinê ve têl bi têl jiyanek nû lê tê honandin e. Parastina vê mîrateya şoreşgerî û avakirina xeta Yekîtiya Neteweyî ya ku ji hêla jinan ve li her çar perçeyên Kurdistanê tê rêvebirin, sedema dîrokî ya hebûna me ye. Ev ruhê yekîtiyê, ku ji parçebûnê derbas dibe, keleh û destkeftiya herî mezin a gelên ku bi hişmendiya neteweyî ya demokratîk ve hatine yek kirin e. Di dilê vê xetê de em modela Jiyana azad a wekhev wek alternatîfa li hemberî pergala xwedî lê derketine re dibînin. Em bi hîşmendiya jinan a ku li qeraxên Dîcle û Firatê şîn bûye; jiyanek demokratîk, jina azad û civakek azad ava dikin û mêran ji qodên serdestiyê rizgar dikin.”
Bang li jinan kirin
Arîfe Aslanê diyar kir ku modela azadiya jinê zerba herî mezin a li dijî koletiyê ye û îfadeya herî berbiçav a îdeala me ya jiyana sosyalîst e û wiha dawî li axaftina xwe anî: “Wekî berhevoka van hemû pêvajoyên berxwedan û avakirinê, em bang li hemû jinên cîhanê dikin ku di bin sîwana Konfederasyona Jinên Demokratîk de li dijî êrîşên gerdûnî tevlî têkoşîna hevpar û jiyana rizgariya jinan a demokratîk bibin. Em, wekî jinên TJA yê; careke din li bajarê Wanê bang dikin. Di 8ê Adara 2026an de, em ê qadan ne tenê bi dirûşmeyan, bi felsefeya ku jiyan bi xwe ye ‘Jin, Jiyan, Azadî’ ve tijî bikin. 8ê Adarê ne tenê rojek berxwedanê ye, ew êdî ji bo me roja pîroz kirin û avakirina jiyanek nû ye. Ji bo ku em îrade û dengê jiyana xwe zêde bikin, em hemû jinan di hefteya 8ê Adarê de vedixwînin berxwedan û avakirinê.”
Piştî daxuyaniyê jinan çalakiya xwe li gel stranan, bi gerandina govendê bi dawî kir.
