Berdevk û rêveberên Saziyên Zimanê Kurdî bi boneya 21ê Sibatê Roja Zimanê Zikmakî ya Cîhanê, bang li gel kirin ku beşdarî meşa Amedê bibin û gotin: “Xelat dil ziman, zimanê me dilê me ye. Werin em bi hev re ji bo qezenckirina statuya mafê zimanê Kurdî bimeşin.”
Saziyên Zimanê Kurdî û Platforma Saziyên Demokratîk û Şaredariya Bajarê Mezin a Amedê ji bo meş û daxuyaniya bi boneya 21ê Sibatê Roja Zimanê Zikmakî ya Cîhanê, bang li gelê Amedê kirin. Endamê Komîsyona Ziman a OHDê Mehmet Emîn Gokdemîr, Berdevka Meclîsa Ziman a Konseya Bajêr Leylana Sidiq, Hevserokê MED-DERê Remzî Azîzoglu, mamosteya zimanê Kurdî û rêvebera MED-DERê Dîlan Guvenç, û Berdevka Meclîsa Şaredariya Bajarê Mezin a Amedê Demet Ceylan ji ajansa me re axivîn û bal kişandin ser mafên ziman û destnîşan kirin ku di qada hiqûqî de hemû ziman wekhev in.
Rêveberên saziyan diyar kirin ku zimanê Kurdî ji bo ku ji windabûnê rizgar bibe û di jiyana gelemperî de bibe xwedî bandor, divê bibe xwedî statuyeke fermî û perwerdehiya bi Kurdî di hemû qonaxên perwerdehiyê de were qebûlkirin.
‘Ziman hebûn û kesayetiya me ye’
Rêveberên saziyan destnîşan kirin ku ziman ne tenê amûreke ragihandinê ye, di heman demê de hebûn û nasnameya mirovan e û gotin: “Ziman xelata dil e, zimanê min dilê min e. Ji bo xelata dilê xwe û dilê we, 21ê Sibatê roja zimanê zikmakî ya dayîkê ya cîhanê em ê bi hev re pîroz bikin. Statuya zimanê xwe, perwerdehiya zimanê xwe bi hev re bixwazin. Hûn jî werin, li zimanê xwe xwedî derkevin. Zimanê we kesayetiya we ye, hebûna we ye. 21ê Sibatê roja Şemiyê bi şiyara ‘Statuya zimanê Kurdî, perwerdehiya bi Kurdî’ em ê li qadan bin. Meş û daxuyaniya me saet 12:00an de li ber avahiya DBPê (Oryil) heta ber AZC Plazayê berdewam bike. Perwerdehiya bi zimanê dayikê mafekî bingehîn û gerdûnî ye.”
