Fermandariya Giştî ya Hêzên Ewlekariya Hundirîn a Kantona Cizîrê da zanîn ku dema karwanê hêzên ewlehiyê yên hikumeta demkî ber bi Hesekê ve hatiye, şaneyên terorîst gule lê barandine û piştî mudaxeleye hêzên wan gelek gelek endamên wan şaneyan hatine girtin.
Fermandariya Giştî ya Hêzên Ewlekariya Hundirîn a Kantona Cizîrê derbarê gulebarankirina şandeya Hikûmeta Demkî de daxuyaniyek da. Fermandariyê da zanîn ku dema karwanê hêzên ewlehiyê yên Hikumeta Demkî ber bi Hesekê ve hatiye, şaneyên terorîst gule lê barandine. Di daxuyaniyê de wiha hate gotin: “Dema ku hêzên me Hêzên Ewlekariya Hundirîn a Kantona Cizîrê, li gorî peymana di navbera Şam û Hêzên Sûriyeya Demokratîk de, erka xwe ya ewlekirina ketina hêzên ewlehiyê yên hikumeta Sûriyeyê bo bajarê Hesekê pêk dianî, karwan rastî gulebarana rasterast a şaneyên terorîst ên ku hewil didan ewlehiyê têk bibin û kaosê li herêmê biafirînin, hat.”
Endamên DAIŞê hatin girtin
Fermandariyê diyar kir ku hêzên wan demildest tev geriyan da ku ewlehiya karwan misoger bikin û ev agahî dan: “Hêzên me hatin çalakkirin û şaneyên terorîst ên ku tev li êrişê bûyîn, hatin şopandin. Di encama van operasyonan de gelek endamên van şaneyan hatin girtin û lêpirsîn berdewam dikin.” Hate diyarkirin ku ji bo pêşîgirtina li her xetereyeke potansiyel a li ser sivîlan, hêzên wan qedexeya derketina derve ya demkî ragihandiye da ku tevgera şaneyên terorîst sînordar bikin û rê li ber wan bigirin. Di daxuyaniyê de ev tişt hatin gotin: “Ev tedbîr bi rastbûn û pileya berpirsiyariyê ya bilind hatin bicihanîn, beşdarbûna mîsyonê bi serkeftî qediya, bêyî ku tu qurbanî yan birîndarên sivîl çêbin.”
‘Tedbîrên pêwist tên girtin’
Di dewama daxuyaniyê de wiha tê gotin: “Di encama êriş û çalakiyên van şaneyan de, yek ji şervanên me dema ku erka xwe ya parastina ewlehî û aramiyê pêk dianî, birîndar bû û ew dermankirina pêwîst distîne. Hêzên Ewlekariya Hundirîn a Kantona Cizîrê pabendbûna xwe ya berdewam ji bo pêkanîna erkên xwe bi tundî û berpirsyarî piştrast dikin û biryardariya xwe ji bo şopandina hemû kesên ku hewl didin ewlehiya herêmê û ewlehiya gelê wê xerab bikin, piştrast dikin. Her wiha ew pabendbûna xwe bi peymanên îmzekirî û parastina aramî û ewlehiya giştî teqez dikin.”
