Hevserokê Kongreya Neteweyî ya Kurdistanê (KNK) Ehmed Karamûs diyar kir ku li dijî Kurdan projeya qirkirinê di dewrê de ye û xwest ku demildest kongreya neteweyî pêk bê.
Hevserokê Kongreya Neteweyî ya Kurdistanê (KNK) Ehmed Karamûs ku derbarê pêşketinên dawiyê de ji Ajansa Nûçeyan a Hewarê re axivî, balkişand ser metirsiyên li pêşiya gelê Kurd. Karamûs diyar kir ku bi êrişên li ser taxên Şexmêqsûd û Eşrefiyê yên Helebê re qonaxeke nû dest pê kir û wiha got: “Di vê qonaxê de stratejiya desthilata Şamê diyar bû. Li ser tifaqên hatine çêkirin çi li Washington, çi li Parîs dibe û çi jî di qada navnetewî de be, gelek hêzan tifaqek fermî çêkirin. Di vê tifaqê de desthilata Şamê bi pêşengiya Tirkiyeyê êrişî tevahiya Rojavayê Kurdistanê bike, armanca wan ew bû tevahî destkeftiyên Rojavayê Kurdistanê bên tesfiyekirin.”
‘Bi rihê neteweyî pêşiya komployê hate girtin’
Li ser têkoşîna neteweyî ya derketî holê Karamûs anî ziman ku gelê Kurdistanê ji her çar parçeyên Kurdistanê û li diyasporayê rihek neteweyî nîşanda û ev tişt gotin: “Di dîroka Kurd de bi şêwazek îstisna bi berxwedaneke bêhempa daketin kolanan. Ev berxwedan li pêşiya vê projeya tesfiyekirina gelê Kurd bû astengek. Gelê Kurd bi yekrêziya xwe pêşî li komkujiyan girt. Her ku diçe ev hestên neteweyî bilind dibin. Vê bandorek mezin li cîhanê kir. Piştî van çalakiyan ew bêdengiya gelek welatan hêdî hêdî hat şikandin. Ev bi saya vîna gelê Kurd ku tesfiyê qebûl nake çêbû. Em bi hêvîne vê berteka gelê Kurd peyamek dabe sazî, rêxistin û partiyên Kurdistanî yên çar parçeyên Kurdistanê. Divê peyama gelê xwe têbigihin. Li gor wê tevbigerin û yekrêziyê çêbikin, li gorî stratejiyeke nîştimanî li hev bikin.”
‘Dixwazin destkeftiyan ji holê rakin’
Ehmed Karamûs wiha qala hewldanên KNK’ê yên ji bo yekbûna partî û saziyên Kurd kir: “Berê jî erk û mîsyonek nîştimanî ya KNK’ê ye ku em yekrêziya Kurd mîsoger bikin. Piştî van bûyeran ne tenê Rojava, her çar parçeyên Kurdistanê di rojeva van hêzan de ye û dixwazin destkefiyên Kurdan ji holê rakin. Li gel ku li Tirkiyeyê pêvajoyeke danûstandinê dimeşe jî dixwazin Kurdan tesfiye bikin. Em jî tenê dikarin bi yekrêziyê ji vê planê re bibin bersiv.”
‘Divê konferansa neteweyî demildest bê kirin’
Têkildarî xebatên dimeşînin jî Karamûs got ku wan bi tevahiya partiyên li Rojavayê Kurdistanê hevdîtin pêkanîne û wiha domand: “Me li nêrîn û pêşniyarên wan guhdar kir. Dê hevdîtinên me bidomin. Li gel Şandeya Kurdî û Başûrê Kurdistanê jî dê hevdîtinên me çêbûn. Em hêvî ne ku demildest em karibin konferansekî netewî li dar bixin. Beriya ku derfetên xwe ji dest bibin. Ev daxwaze gelê Kurdistanê û KNK’ê ye. Niha gelê Kurd erk û rolek cudatir xist ser milê KNK’ê.” Karamûs bang li tevahî Kurdan kir ku di vê dema xweder de bi her alî ve têkoşîna li dora Rojavayê Kurdistanê mezin bikin.
