Platforma Tenduristiyê ya Mêrdînê li dijî êrîş û dorpêça li ser Rojava daxuyanî da û êrîşên li ser Rojava şermezar kir. Platformê destnîşlan kir ku li ser Rojava av, xwarin, derman û ceyran qut kirine û ji ber şertên xerab 5 zarokan jiyana xwe ji dest dane.
Endam û nûnerên Platforma Tenduristiyê ya Mêrdînê li Parka Karayolu ya Mêrdînfê daxuyanî da. Parlamenterên DEM Partiyê û nûnerên saziyên civakî jî beşdarî daxuyaniyê bûn. Di çalakiyê de pankarta “Li Rojava dorpêçî, li Tirkiyeyê binçavkirin. Em jiyanê biparêzin” vekirin. Li ser navê Platformê Bijîşk Kamuran Yildirim daxuyanî da. Kamuran Yildirim, li ser navê Platformê diyar kir ku ew wekî kedkarên tenduristiyê û qada tenduristiyê dixwazin li dijî dagirkirina Tirkiyeyê dengê xwe bilind bikin û got: “Bûyerên îşkence, muameleyên xerab raste rast bandorê li ser mafê mirovan ê tenduristiyê dike. Ev êrîşên li dijî mafên tenduristiyê ne.”
Dr. Kamuran Yildirim, anî ziman ku Rojava îro di bin êrîş û dorpêçek mezin de ye û wiha got: “Rojava îro di bin dorpêçeke mezin de ye. Îro li ser Rojava av, xwarin, derman û ceyran hatiye qutkirin. Xizmeta tenduristiyê ya ji bo welatiyan hatiye astengkirin. Xizmetkarên tenduristiyê nikarin kar bikin. Li gorî agahiyên Hevseroka Heyva Sor a Kurd Hediye Abdullah li Kobanê ji ber şertên tenduristiyê 5 zarokan jiyana xwe ji det dane. Ev mirin ne encama afetên xwezayî ne. Ev mirin ji ber dorpêçkirin, ambargo û astengiyên bi zanebûn in.”
Kamuran Yildirim, da zanîn ku ev tablo li gorî hiqûqa navneteweyî binpêkirina mafê tenduristiyê ye û wiha berdewam kir: “Rojava di heman demê de modela civakê ya wekheviya gelan, azadiya jinê û jiyana hevpar e. Cerebeyên Rojava di heman demê de nîşan dide ku li Rojhilata Navîn jiyanek aştiyane û demokratîk pêkan e. Li navçeya Qoserê ciwanên ku hatine binçavkirin rastî lêdanê hatine. Lê li Nexweşxaneya Dewletê ya Qoserê rapor nedane wan. Bi vê yekê xwestine ku ser îşkenceyê bigirin. Dîsa rewşa ciwanê bi navê Diyar Koç rastiya vê yekê nîşan dide. Parsuyê wî şikandine û travmaya mejî derbas kiriye. Li şûna Diyar Koç serbest darizînin ew bi vî halî girtine û şandine girtîgehê. Ev êrîşên li dijî mirovan nayên qebûlkirin. Li qadên jiyanê raste rast sivîlan û xizmetkarên tenduristiyê dikin hedef.”
‘Îşkence sûcê mirovahiyê ye’
Kamuran Yildirim da zanîn ku îşkence sûcê mirovahiyê ye û got: “Em vareke din dibêjin Îşkence û muameleya xerab sûcê mirovahiyê ye.
Nedayina raporan, astengkirina xizmeta tenduristiyê şirîkatiya sûc e. Meş û xwepêşandan, mafekî zagonî ye.”
Kamuran Yildirim, daxwazên Platforma Tenduristiyê jî rêz kir û got: “Divê di serî de dorpêça li ser Kobanê û tevahiya Rojava bi dawî bibe. Divê ambargoya av, xwarin, derman û ceyranê bi dawî bibe. Divê bi lez ji bo Kobanê koorîdora jiyanê bê vekirin. Divê kesên tenduristiyê binê dike di heqê wan de lêpirsîn bê vekirin. Em wekî Platforma Tenduristiyê ya Mêrdînê emê bişopînin.”
