Nûnerê PYDê Cawîdan Kemal ji Silêmaniyê bang li serokatiya Herêma Kurdistanê kir ku deriyê sinor yê Sêmalka li pêş gel veke da ku ji bo piştgiriya Rojava derbas bibin û bang li gelê Başûr kir ku ji bo parastinê derbasî Rojava bibin.
Nûnertiya Rêveberiya Xweser a Bakur û Rojhilatê Sûriyeyê ya Başûr ji bo piştgiriya rojavayê Kurdistanê bê kirin li bajarê Silêmaniyê yê başûrê Kurdistanê daxuyanî da. Nûnerê PYDê yê Başûr Cawîdan Kemal, Nûnerê Rêveberiya Xweser a Başûr Mihemed Ala, Nûnera Kongreya Star li Silêmaniyê Necme Eloş di daxuyaniyê de amade bûn. Di civîna çapemeniyê de bi zimanê Kurdî û Erebî daxuyanî hatin dayîn.
Nûnerê PYD’ê yê Başûr Cawîdan Kemal axivî û got: “Em bang li gelê Kurd dikin ku piştgiriya Rojavayê Kurdistanê bikin. Em ji gelê xwe re piştrast dikin ku wê HSD şerê man û nemanê bike. Em ê heta dilopa dawî ya xwîna xwe parastinê li Kurdistanê bikin.”
Cawîdan Kemal da zanîn ku dijminê sereke yê Kurdan dewleta Tirk e û ev plana êrişê ya li dijî gelê Kurd ji aliyê dewleta Tirk ve tê kirin û piştgiriya HTŞê dikin.
Di dewama daxuyaniyê de Cawîdan Kemal bang kir û got: “Em li Başûrê Kurdistanê bang li gelê xwe dikin ku hem li navxwe hem jî li derveyî welat piştgiriya Rojavayê Kurdistanê bikin. Ji ber ku gelê me niha bi komkujiya çeteyên Colanî re rûbirû ye. Yek armanca van çeteyan heye ew jî tinekirina gelê me ye.”
Nûnerê PYDê Cawîdan Kemal bang li serokatiya Herêma Kurdistanê kir ku deriyê sinor yê Sêmalka li pêş gel veke da ku ji bo piştgiriya Rojava derbas bibin. Cawîdan bang li gelê Başûr jî kir ku ji bo parastina deskeftiyên Kurdan derbasî Rojava bibin.
Nûnerê PYD yê başûrê Kurdistanê ev bang li hêz û gelê başûrê Kurdistanê kir: “Em bang li Serokê PDKê Mesûd Barzanî, Serokê YNKê Bafil Talabanî û Tevgera Azadiya Kurdistanê dikin ku hêzên pêşmerge û gerîla ji bo piştgiriya Rojava bişînin. Ji ber ku gelê me niha şerê man û nemanê dike. Her wiha em bang li gelê xwe yê başûrê Kurdistanê dikin ku di vê dema zehmet de dakeve ser cadeyan, li ber balyozxane û nûnertiyên welatên cîhanê kom bibe. Da ku ji hemû cîhanê re rabigihîne ku metirsiyeke mezin li ser gelê me heye.”
Di dawiyê de jî Cawîdan Kemal got: “Xwesteka dijminên Kurdan tinekirina doza Kurd e, lê em li vir radigihînin ku em ê şerê man û nemanê bikin û em piştrast dikin ku serkeftin ya me ye.”
