Meclisa Dayikên Aştiyê ya Amedê li dijî êrişên ser Rojavayê protesto bikin ber bi Enqereyê ve rê ketin.
Meclisa Dayikên Aştiyê li dijî êrîşên li ser taxên Şêxmeqsud û Eşrefiye yên Helebê li Parka Koşuyolu ya Bajarê Nû ya Amedê daxuyanî dan û ber bi Enqereyê ve rê ketin. Di daxuyaniyê de pankarta “Em dayik rê nadin şer” daliqandin û dovîzên “Rojhilat rûmeta me ye”, “Rojava rûmeta me ye”,”Bijî Berxwedana Rojava”, “Bijî Berxwedana Rojhilat” rakirin. Hevserok û rêveberên partiyên siyasî, nûnerên saziyên sivîl ên demokratîk û gelek kes tev li daxuyaniyê û oxirkirina dayikan bûn. Daxuyaniyê endama Dayikên Aştiyê ya Amedê Nezahat Teke xwend.
‘Îslamiyet, ne kuştîna jin û zarokan e’
Nezahat Teke anî ziman ku agir bi dilê dayikan dikeve. Nezahat Teke destnîşan kir ku ew naxwazin şahidiya êş û nexweşiyan bikin û got: “Îro agir li dayikan dikeve. Em naxwazin di nava malên xwe de de tiştên nexweş bibînin. Ji ber ku me digot qey dê pêvajoyeke baş çêbibe, lê mixabin em dibînin ku îro li Rojava qetlîam pêk tên. Em wek Dayikên Aştiyê, wek dayikên Rojhilat, Bakur û Başûr; em hemû li dijî van kuştinan in. Ji ber ku yên têne kuştin zarokên biçûk in, xelkê sivîl in. Em bang li hemû cîhanê dikin. Em bi taybetî bang li bawermendên dînê Îslamê dikin; yên ku dibêjin em navê Xwedê hildidin lê xwîna mirovan dirijînin. Em ji wan re dibêjin, Îslamiyet ne ev e! Ne kuştina jinan û zarokan e. Em vê hovîtiyê şermezar dikin. Bi kîn û nefreta di dilê dayikan de, em biryarên şerên ku ji Enqereyê derdikevin şermezar dikin. Em ji bo dayikên leşkeran û dayikên polîsan jî giriyan; me got dilê wan jî dişewite. Lê mixabin tu kesî ji bo zarokên me negiriya.”
‘Zarokên me bimirin, xew li me heram e’
Di berdewama axaftina xwe de Nezahat Teke bal kişand ser daxuyaniyên desthilata AKPê û got: “Di serdana me ya Enqereyê de, rayedaran ji me re digot ‘dê tiştên baş çêbibin’ Ez niha ji wan dipirsim, Ma ‘tiştên baş’ ev bûn ku hûn bedena jineke bêcan ji qata sêyemîn davêjin xwarê? Ma ‘tiştên baş’ qetlîam bûn? Em ê dîsa herin Enqereyê û em ê hesabê van tiştan bipirsin. Bi qasî ku zarokekî me were kuştin, xewa şevê li me heram e. Em ê destûrê nedin ku ev pêvajoya aştiyê xera bibe. Gelek sal in Rêberê Gelê Kurd ji bo aştiyê têdikoşe. Em jî li pişt vê têkoşînê ne. Îslamiyet ne ew e ku zarokekî biçûk heft rojan di nava malê de bê av û xwarin bimîne.”
‘Her derê berxwedana xwe bidomînin’
Di dawiya axaftina xwe de Nezahat Teke bang li DAIŞ û piştgirên DAIŞê kir û wiha got: “Xwedê riya bihuştê nîşanî we nede! Birêz Bahçelî, te behsa biratiya gelan dikir. Ma biratî ev e? Gunehê zarokên Rojava çi ye? Em ê li her derê berxwedana xwe bidomînin.”
Piştî daxuyaniyê girseya kombûyî dayikan bi dirûşma “Bijî Berxwedana Rojava” oxir kirin.
