Serokê Meclisê Numan Kurtulmuş bi daxuyaniyeke ragihand ku ew dê di demekê herî zû de Komîsyona Çavderiyê ya Meclisê ava bikin û wiha got: “Piştî Komîsyon hate avakirin dê xebatên çavderiyê bike û xebatên weke pêşniyaran bi civakê û saziyên berpirs re parve bike. Di demeke herî nêz de Komîsyon dê dest bi xebatan bike.”
Serokê Meclisê Numan Kurtulmuş derbarê Komîsyona Çavderiyê ya Meclisê de ku di çarçoveya pêvajoya Aştî û Civaka Demokratîk de dê li Meclisê bê avakirin li Meclisê civîna çapemeniyê li dar xist û daxuyanî da. Numan Kurtulmuş diyar kir ku ew ji bo avakirina Komîsyona Çavderiyê ya Meclisê hatine merhaleya dawî û wiha got: “Me ev pêvajo bi serkeftineke mezin heta vê merhaleyê anî. Ev pêvajo ne meseleya tenê partiyekê û siyasetê ye. Ev pêvajo ne pêvajoyeke ranta siyasî û xetereyê ye. Ev projeya dewletê ye û piştgiriya gel jî ji bo vê pêvajoyê heye.”
‘Divê tu kes li ser pêvajoyê hesaban neke’
Numan Kurtulmuş anî ziman ku divê tu kes li ser pêvajoyê hesaban neke û wiha axivî: “Di vê pêvajoyê de ji bilî Tirkiyeyê çavekî 3yemîn tune ye. Yanî dewletek derve çavderiyê nake. Çavderiya pêvajoyê gel dike û Meclis dike. Di xebatên Komîsyona Meclisê ya sala par de gelek beşên cuda yên civakê hatin û axivîn. Di encamên xebatên demdirêj de raporek jî hat amadekirin. Rapor nexşereyek e û ev nexşerê derî û derfetên nû li pêşiya Tirkiyeyê vedike. Di meha Tebaxê de jî qanûna çarçoveyî li Meclisê hate erêkirin. Erêkirina qanûnê destkêftiyeke mezin ji bo lihevkirineke demokratîk e. Piştre jî desteyek bi serokatiya Cîgirê Serokkomar birêz Cevdet Yilmaz hate avakirin û dest bi xebatan kir.”
‘Komîsyon wê di demek herî nêz de dest bi xebatê bike’
Numan Kurtulmuş destnîşan kir ku li gorî qanûnê Komîsyona Çavderiyê ya Meclisê jî dê dest bi xebatan bike û wiha pê de çû: “Ev Komîsyon dê li ser navê gel çavderiyê bike û bişopîne. Her wiha yek ji peywîra mezin a vê Komîsyonê ew e ku dê bi awayekî şefaf civakê agahdar bike û piştgiriya gel xurt bike. Piştî Komîsyon hate avakirin dê xebatên çavderiyê bike û xebatên weke pêşniyaran bi civakê û saziyên berpirs re parve bike. Di demeke herî zû de Komîsyon dê dest bi xebatan bike. Di serî de dê biryarên qayde û esasan bigire. Yanî çi xebatan bike dê diyar bike. Ji bo Tirkiyeyeke demokratîk û bêpêvçûn dê xebatên xwe bike.”
‘Divê hemû kes zimanê xwe sererast bike’
Numan Kurtulmuş li ser pirsa rojnamegeran da zanîn ku ew dê di demen pêş de li ser lihevkirina partiyên siyasî hejmara kesên di Komîsyonê de cih bigirin jî diyar bikin. Her wiha Numan Kurtulmuş destnîşan kir ku mafê ti kesî nîn e ku zirarê bide pêvajoyê û divê hemû kes li gorî hesasiyeta pêvajoyê tevbigere. Numan Kurtulmuş îdia kir ku dewlet bi îradeyeke mezin gavên pêwîs diavêje û zû bi zû pêvajo xirab nabe. Numan Kurtulmuş diyar kir ku qanûna çarçoveyî sê misogeriyan dide û wiha got: “Yek tespît û teyît e. Ev garantiyeke mezin e. Ya din desteya di bin serokatiya Cîgirê Serokkomar de ye. Ya sêyemîn jî Komîsyona Çavdêriyê ya Meclisê ye. Divê hemû kes zimanê xwe sererast bike û dev ji ezberên siyasî yên berê berde. Divê em yekîtiya xwe xurt bikin. Bi îzna xwedê em ê bi zimanekî nû û siyaseteke nû bi vê re bibin.”













