Hêzên Ewlekariya Hundirîn li Helebê ragihandin ku yên ji hêla hikûmeta demkî ya Şamê ve hatine revandin bi tevahî sivîl in û destnîşan kir ku hikûmeta Şamê û komên wê berpirsiyarê jiyan û ewlehiya wan in.
Navenda Ragihandinê ya Hêzên Ewlekariya Hundirîn li Helebê daxuyaniyek weşand û diyar kir ku çeteyên Hikûmeta Demkî bi dehan ciwan dema ku ji taxa Şêxmeqsûd derdiketin revandine. Di daxuyaniyê de her wiha hate destnîşankirin ku çeteyan dû re di medyayê de ev ciwanên revandî wekî şervanên Hêzên Ewlekariya Hundirîn li Helebê nîşan dan. Hêzên Ewlekariyê got ku ev idiayên hikûmetê ne rast in.
Daxuyanî wiha ye:
“Di çarçoveya qirkirina sîstematîk a ku ji aliyê kom û milîsên hikûmeta Şamê ve tê kirin de, van koman bi dehan ciwanên sivîl, dema ku ji taxa Şêxmeqsûd derdikevin ew bi zorê ji malbatên an veqetandin û revandin. Piştre wan ew di medyayê de, bi derewîn wekî ku ew şervanên di nav refên me de ne nîşan dan.
Ev kiryara sûcdar a eşkere nêzîkatiyek sîstematîk a berevajîkirina rastiyan, revandina sivîlan, û bikaranîna wan wekî amûrên propagandayê ji bo veşartina sûcên koçberkirin, bombebarankirin û tirsandinê, nîşan dide. Ev dubarekirina heman sûcên ku ji hêla van koman ve li herêma peravê û Siwêdayê hatine kirin e.
Em piştrast dikin ku yên hatine revandin bi tevahî sivîl in, û em hikûmeta Şamê û komên wê berpirsiyarê jiyan û ewlehiya wan dibînin. Em bang li civaka navneteweyî dikin ku berpirsiyariyên xwe yên qanûnî û exlaqî bicîh bîne, lêpirsînek lezgîn li ser van binpêkirinan bide destpêkirin, wan bi eşkere şermezar bike, û sûcdaran wekî sûcdarên şer darizîne.”
