Li Girava Cava ya Endonezyayê ji ber baranê hezaz çêbû û di encamê de 30 kesan jiyana xwe ji dest da. Rayedaran ragihand ku xebatên lêgerînê bênavber dewam dikin.
Roja Pêncşemê bihûrî li sê gundên herêma Cilacap hezaz çêbû, piştre rojên Şemî û Yekşemê jî li herêma Banjarnegara 2 hezaz çêbûn.
Berdevkê Saziya Rêveberiya Afetê ya Neteweyî Abdul Muhari ragihand ku li Banjarnegara cenazeyên 7 kesên din dîtine û li vir bi giştî 10 mirî û 18 winda hene. Hat diyarkirin ku di afeta li Cilacap de hejmara kesên jiyana xwe ji dest dane bû 20 kes, 3 kes jî hîna winda ne.
Leşker, polîs û dilxwaz jî di nav de komeke lêgerîn-rizgarkirinê ya 700 kesî li Banjarnegara xebatên lêgerînê didomîne. Lê belê ji ber baranên zêde dewam dikin, li herêmê xeteriya hezazên nû û mezinbûna berhamiyên avê xebatên lêgerînê zehmet dike. Ji bo dîtina windayan makîneyên kar û kuçikên lêgerînê tên bikaranîn. Li heman herêmê nêzî hezar kes jî tehliyeyî qadên bi ewle tên kirin.
Li Endonezyayê dema barana muson a di navbera Mijdar-Nîsanê de her sal dibe sedemê hezaz, lehî û nexweşiyên ji ber avê. Saziya meteorolojî û avhewayê hişyarî da ku eger di hefteyên pêş de barana bi şid dewam bike, dibe ku wê rê li ber karesatên nû vebike.
