TJAyê, bi daxuyaniyekê starta rêzeçalakiyên xwe yên têkildarî 25ê Mijdarê Roja Têkoşîna Li Dijî Şideta Li Ser Jinan da. TJAyê da zanîn ku ew dê ji bo jiyaneke bê tundî têkoşîna xwe mezintir bikin.
Tevgera Jinên Azad (TJA), li Qeraxa MollaKasimê ya Behra Wanê ku laşê Rojîn Kabaîş lê hatibû dîtin, bi daxuyaniyekê starta rêzeçalakiyên xwe yên 25ê Mijdarê Roja Têkoşîna Li Dijî Şideta Li Ser Jinan da. Di daxuyaniyê de pankarta “bi civaka demokratîk, ber bi jiyana azad a bê tûndî ve” hat vekirin û dirûşmeyên “jin jiyan azadî” û “Rojîn Kabaîş sedema serhildana me ye” hatin berzkirin. Hevşaredara Bajarê Mezin a Wanê Neslîhan Şedal, hevseroka DBPê ya Wanê Gonul Ûzûnay, hevseroka DEM Partiyê ya Wanê Gulşen Kûrt, endamên Meclîsa Dayikên Aştiyê, aktivîstên TJAyê û gelek jin tev li daxuaniyê bûn.
‘Her sal li Tirkiyeyê sed hezaran jin tên kuştin’
Aktivîsta TJAyê Evîndar Akbûlût metna daxuyaniyê xwend û da zanîn ku heta ku jin hebe dê berxwedan jî hebe. Evîndar Akbûlûtê anî ziman ku tundiya li ser jinê ne tenê kiryara kesekî, lê belê ev encama pergala mêrserwer e û wiha berdewam kir: “Ev îdeolojiya ku mêrserwer û kapîtalîst hatiye avakirin, her roj bi rengeke nû dijî û jinan qetil dike. Di malan, kolanan de, di nava bajar û gundan de, di siyaseta dewlet û dîroka civakî de jin her gav tê qirkirin û bêdengkirin. Ev tundî û qirkirin ne tenê li ser jinan e, li ser zarokan, xwezayê û hemû jiyanê ye. Her sal li Tirkiyeyê sed hezar jin bi destê mêran tên kuştin, lê belê pergala edaletê hêj jî bêdeng e. Li bajarê Wanê jî her roj em di nav rewşeke pir xetere de dimînin. Jinên ku dixwazin bi xewnên, nasname û azadiya xwe bijîn, têne kuştin.”
‘Tundiya li ser jinê pirsgirêka pergala mêrserweriyê ye’
Bi domdarî Evîndar Akbûlût bal kişand ser rewşa Rojîn Kabaîş û da zanîn ku li Wanê weke Rojîn Kabaiş bi hezaran jin hene ku bi navê desthilatdariya malbatê hatine kuştin, lê dosyayên wan qet nayên vekirin. Evîndar Akbûlût diyar kir ku dewlet û zagonên wê tundiya mêran diparêze û got: “Tundiya li ser jinê ne pirsgirêka malbatê ye, ev pirsgirêka pergala mêrserweriyê ye. Di nava vê pergalê de ku her tişt li ser hêrs, mêrperest û kontrola mêr hatiye avakirin, jin bi her cûre bêrûmetiyê re rû bi rû dimîne. Lê em jin bi rûmeta berxwedanê, bi hêviya azadiyê di hemû qadên jiyanê de dixebitin û li ber xwe didin ku vê pergalê biguherînin. Berxwedana jinê ne tenê di nava şer de ye, jin di her qada jiyanê de xebatan dimeşîne û têkoşîna xwe mezintir dike.”
‘Em ê tundiya li ser jinan bi dawî bikin’
Evîndar Akbûlût destnîşan kir ku ew weke TJAyê dibêjin ku aştî jiyaneke azad û bê tundî ye. Evîndar Akbûlût da zanîn ku ev şer ne tenê qirkirina mirovan e, bi qirkirina xwezayê jî tê meşandin û wiha dawî li axaftina xwe anî: “Şerê herî mezin kuştina dar, çem hwd. e. Ji ber vê yekê em ji şer re dibêjin ‘na’. Em dizanin ku ji şer û tundiya mêserwerî tenê bi hevparî û têkoşîna jinan dikare bê guhertin. Aştî ne fermana dewletan e, aştî bi destên jinan tê avakirin. Li Wanê em bi ruhê Rojîn û hemû jinên hatine qetilkirin dibêjin ku em dê jiyan wan bi rengê berxwedanê bidomînin. Em ê bi yek deng û rengî tundiya li ser jinan bi dawî bikin. Em ê bi kom, hevparî û bi hêvî civaka demokratîk ava bikin û em ê bi ruhê şoreşa ‘jin jiyan azadî’ bibêjin ku ber bi azadiya jinê, ber bi jiyana bê tundî.”
Daxuyanî bi çepik û dirûşmeyan bi dawî bû.
