Bi pêşengiya MEBYA-DERê bi awayekî girseyî serdana sersaxiya du gerîlayan hate kirin. Di sersaxiyê de hate gotin ku têkoşîna gelê Kurd bi saya cangoriyên azadiyê hate van rojan.
Ji bo endamê YPSê Yusuf Gucel (Ferhad Amed) ê ku di 25ê Gulana 2017an de li Metînayê û ji bo endama YJA-Starê Hîcran Koçer (Besê) a ku di sala 1995an de di encama êrişên artêşa Tirk de jiyana xwe ji dest dabûn li navçeya Rezana Amedê şîn hatin danîn. Şîna Yusuf Gucel li Mala Şînê ya Omerliyê û şîna Hîcran Koçer jî li Mala Şînê ya Odabaşiyê hatin danîn.
Bi pêşengiya Komeleya Çand Yekîtî Piştevanî û Alîkariya Ya Malbatên Li Dergûşa Şaristaniyê Xizmên Xwe Winda kirine (MEBYA-DER) serdana şînan hate kirin. Hevserokê Giştî yê DBPê Keskîn Bayindir û parlamenterên DEM Partiyê jî di nav de girseyek qelebalix çûn serdana şînan kirin.
Girse ewilî serdana şîna Gucel kir û paşê jî serdana şîna Hîcran Koçer hate kirin. Di şînan de gelek caran dirûşmeyên wekî “Şehîd namirin” û “Bijî berxwedana gerîla” hatin berzkirin.
‘Hebûn û xwebûna Kurdan parastin’
Parlamentera DEM Partiyê ya Mûşê Sumeye Boz di şînê de axivî û doza cangoriyên azadiya Kurdistanê ji bo parastina rûmet û hebûna Kurdan e û got ku ew ê têkoşîna azadiyê bigihînin armanca wê.
‘Paradigma dê bibe ronesansa Rojhilata Navîn’
Hevserokê MEBYA-DERê Ramazan Dengîz jî wiha axivî: “Ya ku vê pêvajoyê daniye pêşiya me, têkoşîn û keda şehîdên Kurdistanê ye. Paradîgmaya ‘Aştî û Civaka Demokratîk’ ya ku ji aliyê Rêber Apo ve hatiye destpêkirin dê bibe ronesansa Rojhilata Navîn.”
‘Em şîn û reş girê nadin, em serbilind in’
Hevserokê Giştî yê DBPê Keskîn Bayindir jî axivî û anî ziman ku ew ê heta dawiyê têkoşîna xwe ya azadiyê bidomînin û wiha got: “Vê têkoşîna ku ew leheng û qehremanên miletê Kurd dane meşandin, em ê weke malbat û gelê Kurd ji bîr nekin û li pey wan bidin meşandin. Em şîn û reş girê nadin. Em zanin li her bihostek axa Kurdistanê êş û jan heye. Lê em tiştekî din jî dizanin miletekî ku fedayî û qehremanên wî hebe dê bigihîje serkeftinê û jiyanê bi azadiyê tacîdar bike. Em îro li vir şînê girê nadin, em serbilind in. Heta azadiya Rêber Apo û ya gelê Kurd pêk were em ê vê têkoşînê berdewam bikin. Ev têkoşîn bi saya hevkariyê, têkoşîn û kedê hate van rojan.”
