Platforma Saziyên Demokratîk ên Şirnexê bertek nîşanî cezayê li Amedsporê hatiye birîn da û hate gotin ku zimanê Kurdî xeta wan a sor e.
Platforma Saziyên Demokratîk ên Şirnexê li ber avahiya Komeleya Çand û Ziman a Birca Belek bi tevilbûna gelek saziyan daxuyanî da çapemeniyê. Di daxuyaniyê de pankarta, ‘Zimanê Kurdî xeta me ya sor e’ hat vekirin û dirûşma, ‘Zimanê me rûmeta me ye’ hat berzkirin.
Rêveberê Komeleya Çand û Ziman a Birca Belek Rojger Nûh Ant di daxuyaniyê de got ku ev pêkanîn binpêkirina mafê mirovahiyê ye û wiha axivî; “Li dijî Amedsporê ya ku li ser formayê wê reklama Kurdî ya wekî dirûşmeya ’Koma me bona we’ heye û ji aliyê Federasyona Fotbolê ya Tirkiyeyê ve beriya niha hatibû erêkirin, vê carê ew weke hincet hatiye nîşandan û cezayê pereyî lê hatiye birîn. Em weke Platforma Saziyên Demokratîk vê êrîşê li dijî ziman, hebûn û nasnameya gelê Kurd dibînin. Em vê yekê qebûl nakin û bi tundî şermezar û lanet dikin.”
Ant di berdewama axaftina xwe de bal kişand ser pêkanîna Koleja TEDê ya li hember zimanê Kurdî û axaftina xwe wiha domand; “Dîsa di Roja Pîrozkirina Zimanê Tirkî de ji aliyê TED Diyarbekir Kolejiyê ve sonda yekperestî ya yekzimanî ku sed û nod û neh ji zarokên Kurd pêk tên, xwedina wê li dijî hişmendiya civaka demokratîk û gelê Kurd e. Ev nayê qebûlkirin. Ev yek hişmendiya xwe ji yekperestî û polîtîkayên tunehesibandin û pişaftinê digire. Ev yek di civakeke demokratîk de nayê qebûlkirin. Em vê hişmendiyê şermezar dikin.”
Ant herî dawî got ku divê demildest Federasyona Fûtbolê ya Tirkiyeyê biryara xwe ya li hember Amedsporê paşde bikişîne û Koleja TEDê ya Amedê ji gelê Kurd lêborîna xwe bixwaze.
Piştî Ant, parlamenterê DEM Partiyê yê Şirnexê Mehmet Zekî Îrmez jî axivî û got ew van pokîtîkayên li hember zimanê Kurdî şermezar dikin.
Daxuyanî bi çepik û dirûşma bi dawî bû.
