Mûş – Li gundê Başkendê yê bi ser navçeya Gimgimê ve sewalkar amadekariya zivistanê dikin. Sewalkar Emrah Kiliç ku ji bo Cejna Qûrbanê dermaletiyê dike, ji bo sewalên xwe giya û ceh stok kiriye û ji zivistanê re amade ye.
Li herêma Serhedê ji bo debarê çavkaniya herî mezin sewalkarî ye. Xwedîkirina sewalan li hemû herêmê belavbûye û beşeke sereke ya jiyanê ye jî. Li navçeya Gimgim a Mûşê jî çanda sewalkariyê pêş ketiye û welatî bi kirîn û firotina sewalan, şîr, penîr, mast, rûn, torax hwd. debara xwe dikin. Welatiyê bi navê Emrah Kiliç ku ji gundê Başkendê yê bi ser navçeya Gimgimê ve ye, bi xwedîkirina çêlekan debara malbata xwe dike. Kiliç ji bo sewalên xwe ji Gundê Mişko yê li kêleka gundê xwe zozan kirê kiriye û niha jî amadekariya zivistanê dike.
Ji ber nexweşiya tebekê xêr û bêr ji sewalên xwe negirtiye
Emrah Kiliç diyar kir ku wan ji bo sewalên xwe zozan kirê kiriye û da zanîn ku ew dê van sevalan ji bo Cejna Qûrbanê amade bikin. Emrah Kiliç anî ziman ku ew 10 sal in ew bixwe vî karî dike û got: “Em niha dermaletiyê (besîcîlîk) dikin û dikarin debara xwe pê bikin. Sala par cotê sewalan 200–215 hezar lîre bû, lê îsal 260–270 hezar lîreyan difiroşin. Îsal li gorî sala par pariyekî baştir e. Her wiha ev du sal in nexweşiya tebeqê di nava sewalan de digere. Lewma sewalkaran ev du sal in xêr û bêr ji demaletiyên xwe negirtiye. Min par pir zerar kir, 20 çêlekên min ji ber nexweşiya tebekê mirin. Lê îsal nexweşiya tebeqê nekete di nava sewalên min de.”
‘Lênêrîna sewalan havînê hêsantir e’
Emrah Kiliç behsa amadekariyên zivistanê kir û bi lêv kir ku wan giya dirûne û kirine ka. Emrah Kiliç destnîşan kir ku wan ceh jî amade kiriye û ev yek anîn ziman: “Em zivistanê sewalên xwe di goman de xwedî dikin. Lênêrîna sewalan zivistanê pir zehmet e û lêçûnên wê jî zêde ne. Havînê mesref tune ye, tenê heqê şivan tu didî. Lê zivistanê ceh didî sewalan û bihayê ceh pir zêde ye. Torbê ceh 850 lîreyan e, tona kayê 10–12 hezar lîreyan e. Lewma xwedîkirina sewalan havînê hem erzantir hem jî hêsantir e.”
