Seroka Giştî ya MKGê Roza Metîna ku di merasîma vekirina Şaxa MKGê ya Wanê de axivî, bal kişand ser girîngiya rojnamegerên jin û got: “Zext û êrîş berdewam dikin, lê rojnamegerên jin hem bi kamerayên xwe û hem jî bi pênûsa xwe li qadan amade ne.”
Komeleya Rojnamegerên Jin a Mezopotamyayê (MKG) bi merasîmekê şaxa xwe ya Wanê vekir. Wêneyên rojnamevanên jin ên çapemeniya azad ku di êrîşan de jiyana xwe ji dest dane û pankartên “Çapemeniya azad nayê bêdengkirin” di avahiya komeleyê de hatin daliqandin.Hevşaredara Bajarê Mezin a Wanê Neslihan Şedal, Hevberdevka Însiyatîfa Yekitiya Demokratîk Gulcan Kaçmaz Sağyiğit, Tevgera Jinên Azad (TJA), Meclîsa Jinan ên Wanê yên Partiya Wekhevî û Demokrasiyê ya Gelan (Partiya DEM) û Partiya Herêmên Demokratîk (DBP), rêveberên jin ên Şaxa Komeleya Mafên Mirovan (ÎHD) a Wanê, endamên Komeleya Rojnamegerên Dîcle Firatê (DDG), xebatkarên jin ên ku ji hêla qeyûmê Wanê ve ji kar hatine avêtin û rojnamevanên jin ên li bajêr tev li merasîmê bûn.
‘Rojnamegerên jin êdî xwedî MKGê ne’
Di merasîmê de ewilî rojnameger Oznur Deger axivî û diyar kir ku vekirina şaxek MKG ya li Wanê pêwîstiyeke pir girîng bû. Oznur Deger, di berdewamiyê de êrîşên li ser bi bîr xist û got: “Rojnameger ji serdemên herî tarî yên dîrokê ve bûne hedefa hikûmet û dewletê û îro, di pêvajoya nû ya ku ji hêla Rêberê Gelê Kurd Abdullah Ocalan ve hatiye destpêkirin de, em careke din dibînin ku jin dibin hedef. Em dizanin ku civak bêyî çapemeniya azad azad nabe. Em dizanin ku jin, rengê civakê ye û divê xwe birêxistin bikin. Ji Gurbetelliyê bigire heya Nagihan û Cîhan, em têkoşîna xwe ya ji bo rastiyê birêxistin dikin. Niha, rojnamegerên jin xwedî MKGê ne ku ew dikarin tê de xwe birêxistin bikin.”
‘Em hêza xwe ji Nagihan, Gurbetellî û Gulistanê digirin’
Seroka Giştî ya MKGê Roza Metîna jî bal kişand ser têkoşîna rojnamegerên jin û wiha got: “Em bi mîrateya têkoşîna bi salan hatine vê rojê û ev mîrat hêzê dide me. Zext û êrîş berdewam dikin, lê rojnamevanên jin hem bi kamerayên xwe û hem jî bi pênûsa xwe li qadan amade ne. Duh li Mersînê êrîşî hevkarên me kirin. Em careke din êrîşê şermezar dikin. Tevî hemû êrîşan, rojnamevanên jin ên ku biryardariya xwe ya xebatê didomînin hêviyê didin vê pêvajoyê. Em hêza xwe ji Nagihan, Gurbetellî û Gulistanê digirin. Em careke din li vir şehîdên çapemeniya azad bi bîr tînin. Ez bi vê munasebetê dubare dikim ku em ê pênûsên wan bernedin.”
‘Hebûna MKGê ya li Wanê dê bandoreke mezin bike’
Li ser navê TJAyê jî Gulşen Kûrt axivî û da zanîn ku ew rojnamegerên jin pîroz dikin ku têkoşîna Gulistan, Nagihan û Cîhan Bîlgîn mezin kirine. Gulşen Kûrt, axaftina xwe wiha bi dawî kir: “Di demekê wiha de ku jin rastî tundî û qetlîamê tên, bûyîna dengê jinan karekî mezin ê dilsoziyê ye. Em dizanin ku bê azadiya jinan aştî nayê civakîkirin û jiyaneke demokratîk jî nayê avakirin. Vekirina şaxa MKGê ya li Wanê dê ji bo rêxistinkirina rojnamegerên jin ku stûna ragihandina vê rastiyê ne, bandoreke mezin bike.”
Rojnameger Oznur Deger weke seroka şaxa Wanê hat hilbijartin.
