Şirnex – Li navçeya Elkê ya Şirnex şîna endamê PKKê Kadrî Olaş ku di 5ê Hezîrana 2017an de di şer de jiyana xwe ji dest daye bi girseyî hat ziyaretkirin.
Navenda Ragihandin û Çapemeniyê ya Hêzên Parastina Gel (HPG-NRÇ) di 22yê Tîrmehê de ragihand ku endamê wan Kadrî Olaş (Mûnzûr Mordem) di 5ê Hezîrana 2017an de di têkoşîna li Herêmên Parastina Medyayê de jiyana xwe ji dest daye. Li ser vê yekê malbata Kadrî Olaş a li Taxa Karşiyaka ya navçeya Elkê rûdine şîn danî. Endam û rêveberên DEM Partî û DBPê yên Şirnex û navçeyên wê, Botan TUHAD-DER, Dayikên Aştiyê, aktîvîstên TJAyê di pêşengtiya Komeleya Yekitî Çand Piştevanî û Alîkariyê ya bi Malbatên Xizmên xwe li Derguşa Şaristaniyê Windakirinê re (MEBYA-DER) ya Şirnexê de serdana şîna Kadrî Olaş kirin. Girseya li navenda navçeyê kom bû bi berzkirina dirûşmeya “Şehîd namirin” heya mala malbatê ya şîn lê hate danîn meşiyan.
‘Xwedî derketina li şehîdan xwedî derketina li pêvajoyê ye’
Di şîna ku li taxa Karşiyakayê hate danîn de destpêkê ji bo cangoriyên demokrasî û azadiyê rêz hate girtin û piştre Hevserokê DEM Partiyê yê Şirnexê Ramazan Ûysal axivî. Ramazan Ûysal diyar kir ku ew îro bi saya cangoriyên Tevgera Azadiyê gihiştine vê qonaxa Aştî û Civaka Demokratîk. Ramazan Ûysal banga Rêberê Gelê Kurd Abdullah Ocalan a 27 sibatê bi bîr xist û destnîşan kir û wiha domand: “Xwedî derketina li şehîdan xwedî derketina li pêvajoyê ye. Her wiha çiqas pêvajo were pêşxistin ew qas xeyalên cangoriyan ê pêk were.”
Piştî axaftinan ji bo Olaş mewlûd hat xwendin û serdana şînê bi dawî bû.
