Şaxa ÎHDê ya Wanê 13emîn kongreya xwe li dar xist. Di kongreyê de bal kişandin ser pêvajoya bi banga Rêberê Gelê Kurd Abdullah Ocalan hate destpêkirin û gotin ku divê sivîl jî tev li vê pêvajoyê bibin.
Şaxa Komeleya Mafên Mirovan (ÎHD) a Wanê kongreya xwe ya 13emîn li eywana Azîz Yûral a Platforma Şaxan a KESKê li dar xist. ÎHDê ev kongre diyariyê Dayikên Aştiyê kir û li eywana ku kongre lê hat lidarxistin jî pankartên Dayikên Aştiyê daliqandin. Her wiha wêneyên kesên di binçavan de hatine windakirin jî hatin hilgirtin. Dayikên Aştiyê, endam û rêveberên partiyên siyasî, parlementer, nûnerên saziyên sivîl, saziyên jinan û gelek welatî tev li kongreyê bûn.
‘Bi banga Birêz Ocalan hawirdorek aştiyê hatiye afirandin’
Di kongreyê de ewilî dîwan hat hilbijartin û dû re jî bi deqeyek rêzgirtinê kongre dest pê kir. Serokê
Baroya Wanê Sînan Ozaraz axivî û wiha got: “Kurdistan, Tirkiye û Rojhilata Navîn bi salan di nava şer
de ne û ev yek hîn jî berdewam dike. Rejîma ku li Tirkiyeyê li ser înkara Kurdan ava bû hemû maf
binpê kir. Îro, di nav vê bêhiqûqiyê de, bi banga Birêz Ocalan hawîrdorek aştiyê hatiye afirandin ku
em dikarin bi biratî bijîn. Em hemû daxwaz dikin ku ev pêvajo bi pêş bikeve.”
‘Têkoşîna dayikan û zarokên wan ev pêvajo avakiriye’
Piştre hevserokê ÎHDê yê Şaxa Wanê Mehmet Salîh Coşkûn axivî û bal kişand ser şert û mercên
avabûna ÎHDê. Mehmet Salîh Coşkûn, diyar kir ku ÎHD, 39 sal berê li ber deriyê girtigehan avabûye û
got: “ÎHD, 39 sal e li dijî binpêkirina mafan ên di girtîgehên Kurdistan û Tirkiyeyê de têkoşînê
dimeşîne. Pêşngên me 1986an de ev al hildane û niha jî em vê alê digirin. Ji bo parastina nirxên xwe
em jî têkoşîna xwe dê bidomînin. Îro pêvajoyek nû li pêşiya me ye û armanca vê pêvajoyê jî
çareserkirina pirsgirêka Kurd e. Ev pêvajo ji bo girtiyan jî hêviyek mezin e. Dayikên Aştiyê jî di têkoşîna
ÎHDê de cihekî pir mezin û girîng digire. Ev pêvajoya li pêşiya me bi têkoşîna Dayikên Aştiyê û bi
têkoşîna zarokên wan ava bû û didome.”
‘Divê sivîl jî tev li pêvajoyê bibin’
Nûnerê Herêmî yê İHDê Tahir Saçaklı jî axivî û ev tişt anî ziman: “Piştî rejîma cuntayê ya sala 1980an, dema ku kes nikarîbû behsa mafên xwe bike, komele hat damezrandin. İHDê tevî van hemû zilm û komkujiyan jî ev têkoşîn domand. Di şerê 40 salî de êşên mezin hatin kişandin. Niha pêdiviya herî mezin a van axan aştî ye. Înkara 100 salî divê niha bi dawî bibe. Hikûmet êdî nikarin bi vê polîtîkaya şer temenê xwe dirêj bikin. Ev qonax bi dawî bûye. Em bawer dikin ku pêvajoya ku îro berdewam dike dê serkeftî be. Ne tenê rayedarên dewletê, divê sivîl jî beşdarî vê pêvajoya aştiyê bibin. Ji niha û pê ve, ji bo misogerkirin û domandina aştiyê karekî me yê pir mezintir heye û em ê ji bo bicihanîna vê mîsyonê têbikoşin.”
Hevserokên nû hatin hilbijartin
Piştî xwendina peyama Hevserokên ÎHDê, rapor hatin xwendin. Di hilbijartinên bi yek lîsteyê de,
Ayten Kiran û Mehmet Salîh Coşkun wekî hevserokên Şaxa ÎHDê ya Wanê hatin hilbijartin.
