Gelê Mexmûrê ji ber zêdebûna zext û gefên hikûmeta Iraqê û girtina şandeya Meclisa Gel a Mexmûrê li Bexdayê, danê sibehê heta benda kontrolê ya Iraqê meşiyan û konê çalakiyê vedan.
Wargeha Mexmûrê di bin dorpêça PDKê û hikûmeta Iraqê r de ye. Ji 10ê Nîsanê ve Iraq rê nade kel û pel bikevin nava wargehê, rê nade karker biçin ser karên xwe û nasnameyên gelê wargehê nû nakin.
Ji bo çareserkirina pirsgirêka nasname û ambargoya li ser wargehê şandeyek ji Meclisa Gel a Mexmûrê çûbûn Bexdayê, piştî bi Wezareta Edaletê re hevdîtin kir, di vegerê de hat girtin. Li ser vê yekê danê sibehê gelê Mexmûrê bi awayekî girseyî li dijî zêdebûna zextên hikûmeta Iraqê yên li ser wargehê dest bi meşê kirin. Di meşê de bê navber dirûşmên ‘Bijî berxwedana Mexmûrê’ berz kirin.
Gelê Mexmûrê ku heta benda kontrolê ya ku hêzên leşkerên Iraqê kontrol dikin, helwesta raber kirin. Di encama hevdîtinek li ser lingan hate kirin de hate gotin nava çend saetan de şandeya Meclisa Gel a Mexmûrê ya hatî girtin wê berdin. Li wir daxuyaniyek hate dayîn ku heta şande neyê berdan wê çalakî bidome.
Li ser vê yekê gelê Mexmûrê ji bo xwedî derketina li îradeya xwe, li ber benda kontrolê hêzên Iraqê konê çalakiyê vedane. Girseya gel li konê çalakiyê, helwest û berxwedana xwe berdewam dike.
