TJA dê bi dirûşma “Diyariya herî xweş a ji bo dayikan aştî ye” dê di çarçoveya 15ê Gulanê Cejna Zimanê Kurdî de bi boneya roja dayikan li Amedê bernameyekê li dar bixe.
Tevgera Jinên Azad (TJA) di çarçoveya 15ê Gulanê Cejna Zimanê Kurdî de bi boneya roja dayikan dê bi dirûşma “Diyariya herî xweş a ji bo dayikan aştî ye” di 11ê Gulanê de li Qada Seyranê ya Karakopru ya navçeya Yenîşehîrê (Qada Şitilan) ku li ser rêya Amed û Mêrdînê ye bernameyekê li dar bixe. Bername wê di navbera saet 10.00an û 17.00an de bê lidarxistin. Hevseroka DBPê ya Giştî Çîgdem Kiliçgun Ûçar, aktivîstên TJAyê, Dayikên Aştiyê, endam û rêveberên rêxistinên DBPê û DEM Partiyê, nûnerên saziyên sivîl ên civakî û gelek jin dê beşdarî bernameyê bin.
Di bernameyê ku dê bi xwarina taştê dest pê bike de dê ewilî li ser navê Dayikên Aştiyê dayikek têkildarî pêvajoyê û girîngiya rojê axaftinekê bike. Dû re Hevseroka DBPê ya Giştî Çîgdem Kiliçgun Ûçar dê biaxive. Her wiha ji bo dayik têkildarî pêvajoyê biaxivin dê kursiyek bê danîn. Pişt re bername dê bi xwendina helbestan berdewam bike. Dû re dayikên dengbêj dê kilaman bêjin û pêşbirka zanînê dê bê kirin. Her wiha zûgotinok dê bên gotin û çîrok bên vegotin. Bername dê bi şahiya stranan bi dawî bibe.
