Mitînga 1ê Gulanê bi tevlibûneke girseyî li navçeya Kadikoyê pêk hat. Li ser navê Hezên Ked û Demokrasiyê aktîvîsta TJAyê Ayşe Aksoy metna daxuyaniyê xwend û diyar kir ku têkoşîna wan ji bo civakeke demokratîk e.
Bi pêşengiya Sendîkaya Karkerên Şoreşger (DÎSK), Konfederasyona Sendîkayên Kedkarên Cameweriyê (KESK), Yekitiya Bijîşkên Tirk (TTB) û Yekitiya Odeyên Endezyar û Mîmarên Tirk (TMMOB), bi minesebeta 1ê Gulanê Roja Kedkar û Karkerên Cihanê bi dirûşmeya, “Ji bo ked, edalet, azadî û demokrasiye em ê bi ser bikevin” li Qada Rihtim a navçeya Kadıkoyê ya Stenbolê mitîngek hat lidarxistin. Hevseroka Giştî ya Partiya Wekhevî û Demokrasiyê ya Gelan (DEM Partî) Tulay Hatîmogullari, serok û rêveberên partiyên siyasî, rêxistinên civakî û gelek kes bi pankart û flamayên xwe tev li, mitîngê bûn.
Partiyên siyasî, sendîka û rêxistinên civakî beriya mitîngê li semta Sogutluçeşme ya navçeya Kadikoyê kom bûn. Girseya bi kortejan tev li mitîngê bûn, beriya meşê li vir govend gerandin û stran gotin. Piştre jî girse bi pankart û bi kortejan meşiyan qada mitîngê. Girseyê di meşê de bê navber dirûşmeyên, “Bijî Yek Gulan”, “Bijî Serok Apo” herikîn qadê. Mitîngê ji bo bîranîna cangoriyên 1ê Gulanê hemû cangoriyên têkoşîna azadî û şoreşê bi deqîqeyeke rêzgirtinê dest pê kir. Piştî rêzgirtinê nûnerên sendîkayan, partiyên siyasî girseyê silav kirin.
Piştre jî daxuyaniya hevpar sendîkayên mitîng li dar dixînin hat xwendin. Di daxuyaniyê de hat gotin ku jiyaneke wekhev û azad pêkan e û ev yek jî bi têkoşîna hevpar a karkeran pêk tê.
Peyama Demîrtaş hat xwendin
Piştre jî peyama Hevserokê Giştî yê berê yê Partiya Demokratîk a Gelan (HDP) Selahattin Demirtaş ku ji Girtîgeha Edîrneyê şandibû hat xwendin û peyama Şeredarê Bajarê Mezin ê Stenbolê Ekrem Îmamoglû ku şandibû hat xwendin.
Piştre jî xwendekar, jin, karker û kesên teqawîd bûn e li ser dikê axivîn û têkoşîn û daxwazên xwe anîn ziman.
‘Têkoşîna me ji bo civakeke demokratîk e’
Metna daxuyaniyê ya Hezên Kêd û Demokrasiyê ya Kurdî ji aliyê aktîvîsta Tevgera Jinên Azad (TJA) Ayşe Aksoy ve hat xwendin. Ayşe Aksoy bi lêv kir ku têkoşîna wekheviya karker û hemû azadîxwazan berdewam dike û got ku aştî û civakeke demokratîk tenê bi têkoşîna hevpar a çîna karkeran û hemû bindestan pêkan e. Ayşe Aksoy wiha dirêjî da axaftina xwe: “Polîtîkayên şer, dijminatiya bi neteweperestiyê gurrkirî û rejîmên zext û zordarîyê ku îradeya gelan tune dihesibînin, li dijî van hemûyan, em jiyaneke bi hev re, azad, wekhev û li ser xwişk û biratiyê avabûyî diparêzin. Têkoşîna me ji bo civakeke demokratîk e ku tê de hemû kes bikarin bi nasname, bawerî û çanda xwe bi awayekî azad bijîn, tê de şer û mêtingerî nebe; berevajiyê vê, hevgirtin û edalet lê serwer be. Em weke kesên ku li vê meydanê hatine cem hev dizanin ku hêza me ya rêxistinkirî temînata aştî û demokrasiyê ye; em pişta xwe didin vê hêza xwe û em bang li hemû gelan dikin ku werin û em bi hev re vê siberoja hevpar ava bikin.”
Piştî axaftinan Koma Munzur li ser dikê stran gotin û mitîng bi stran, gerandina govendê û berzkirina dirûşmeyan bi dawî bû.
