Bi girseyî serdana şîna Pelîn Yilmaz a ku li Herêma Kurdistanê jiyana xwe ji dest dabû, hat kirin.
Ji bo yek ji pêşengên têkoşîna azadiyê ya jinên Kurd Pelîn Yilmaz (Pelîn Zozan) ku li Herêma Kurdistanê jiyana xwe ji dest dabû, li bajarê wê Wanê şîn hate danîn. Malbata Pelîn Yilmaz, li mala xwe ya li Taxa Karşiyaka ya navçeya Rêya Armûşê şîn danî.
Rêxistinên civaka sivîl û partiyên siyasî yên li bajar jî bi pêşengtiya Komeleya Alîkarî û Piştevaniyê ya bi Kesên Xizmên Xwe li Dergûşa Şaristaniyê Winda Kirin re (MEBYA-DER) serdana şînê kirin. Bi sedan kes bi dirûşma “Şehîd namirin” çûn cihê şînê û ji malbatê re sersaxî xwestin.
Di daxuyaniya PAJKê de hatibû ragihandin ku Pelîn Yilmaz, di 27ê Çileya 2025an de li Herêma Kurdistanê jiyana xwe ji dest daye. PAJKê gotibû: “Têkoşîna rêhevala me Pelînê dê bi têkoşîna rêhevalên wê û jinên her roj ji bo azadiyê li ser pêyane mezin bibe.”
Koordînasyona PAJKê destnîşan kir ku Pelîn Yilmaz ku di demên berê de di Konseya Rêveber a KJKê de cih digirt, 23 salan ji bo avakirina dinyayeke ku jin û gel tê de azad dijîn, têkoşiyaye.
