Rejîma Îranê her roj mirovan darve dike. Her roj bi darvekirina mirovan dikeve rojeva cîhanê. Tê gotin ku Rejîma Îranê ciwanê Kurd Hemid Huseyîn Nejad darve kiriye. Xezûrê wî anî ziman ku ew agahiyê ji zavayê xwe nagirin û bi fikar in.
Rejîma Îranê bi awayekî sîstematîk girtiyên Kurd ên bi sûcên weke “endametiya rêxistinên siyasî” an “xeterî li ser ewlehiya neteweyî” tometbar kirine, bi dar ve dike. Ev yek weke beşek ji siyaseta zordestî û çewisandina li dijî gelê Kurd li Rojhilatê Kurdistanê tê dîtin. Li gel ku rejîm gelek caran bi darvekirina girtiyên siyasî, bi taybetî yên Kurd, hatiye rexnekirin û rastî bertekan hatiye jî Rejîma Îranê helwesta xwe ya tund a dijmirovî berdewam dike. Dîsa her roj welatiyan bi darve dike. Xezûrê Hemîd Huseyîn Nejad anîn ziman ku ew bi guman in zavayê wan hatiye darvekirin. Malbata xezûrê Hemid Huseyîn Nejad guman dike ku zavayê wan hatiye daliqandin û dixwazin her kes li dijî vê rewşê dengê xwe bilind bike. Xezûr da zanîn ku zavê wan du sal berê ji aliyê dewletê ve li ser sinor hate girtin û 8 mehan di bin îşkenceya giran de ma û tu agahî ji wî nedigirtin. Malatê destnîşan kir ku nedihiştin parêzer jî biçin hevdîtina wî.
Di 3 mehên dawî de 230 welatî darve kirin
Rejîma Îranê di 2024an de 972 mirov darve kirin û di 3 mehên dawî yên 2025an de zêdetirî 230 welatî darve kirin. Li gorî daneyên Neteweyên Yekbûyî (NY) yên 2024an li Îranê herî kêm 901 kes hatin darvekirin. Li gorî daneyên Komîseriya Bilind a Mafên Mirovan a NYê di 2023an de 853 mirov û di 2024an de jî 972 mirov hatin darvekirin. Di nava wan de 31 jin hatin darvekirin. Daneyên Rêxistina Efûyê ya Navneteweyî yên 2022an destnîşan dikin ku li 55 welatan cezayê darvkirinê di meriyetê de ye. Li 23 welatan cezayê darvekirinê heye, lê di 10 salên dawî de pêk neanîne. Li gorî raporê 5 welatên ku herî zêde mirov lê hatine darvekirin wiha ne: Çin, Îran, Erebîstana Siûdî, Somalî û DYA.
