Şandeyeke Parlamentoya Ewropayê û Îngîltere ji bo naskirina sîstema demokratîk û piştgiriya Rêveberiya Xweser duh gihaşt herêmê. Şandeyê diyar kir ku ew ê çavdêriyên xwe veguhêzin wezaretên karên derve yên dewletên Yekitiya Ewropayê.
Duh (14 Nîsan) şandeyeke ku ji 12 parlamenterên Parlamentoya Ewropayê û ya Brîtanyayê û endamên saziyên civaka sivîl ku yên Kurd jî di nav de hene, gihaşt Bakur û Rojhilatê Sûriyeyê.
Şande li Navenda Giştî ya Daîreya Têkiliyên Derve ya Rêveberiya Xweser a li Qamişloyê ji aliyê hevserokên daîreyê Îlham Ehmed û Fener Giêt û her du cîgirên wan Gulistan Elî û Robêl Beho ve hat pêşwazîkirin.
Îlham Ehmed bixêrhatina şandeyê kir û ji şandeyê re da zanîn ku di demekê de ku herêm di rewşeke zehmet re derbas dibe, hatina wan girîng e. Xebatên wan ji bo çareserkirina aloziya li Sûriyeyê jî didomin.
Li gorî agahiyên ku me ji şandeyê girtine ew ji bo naskirina sîstema demokratîk û awayê pêkanîna wê hatine herêmê û ew ê projeyên aborî pêşkêşî Rêveberiya Xweser bikin. Her wiha diyar kirin ku ew ê zehmetiyên li pêş Rêveberiya Xweser veguhêzin wezaretên karên derve yên dewletên Yekitiya Ewropayê.
Şande dê 2 rojan serdana partiyên siyasî, sazî û çalakvanên sivîl bike.
