Navenda Nûçeyan – Dayikên Şemiyê li Wan û Şirnexê êrîşên komên çeteyan ên li ser Bakur û Rojhilatê Sûriyeyê şermezar kirin û ji gelê cîhanê xwestin ku li dijî van êrîşan bêdeng nemînin.
Şirnex
Meclîsa Dayikên Aştiyê yên Şirnexê li Cizîr û Silopiyayê daxuyanî dan. Meclîsa Dayikên Aştiyê li ber avahiya Partiya Wekhevî û Demokrasiyê ya Gelan (DEM Partî) a navçeya Silopiyayê daxuyanî da. Nûner û rêveberên Rêxistinên Partiya Herêmên Demokratîk (DBP) û DEM Partî yên Silopiyayê beşdarî daxuyaniyê bûn. Girseyê di daxuyaniyê de pankarta “Rojava rûmeta me ye” hilgirtin û dirûşmeyên “Bijî berxwedana Rojava” berz kirin.Li ser navê Dayikên Aştiyê Asya Tay anî ziman ku dewletên dibêjin mafê mirovan diparêzin û wiha got: “Heke di rastiyê de jî mafê mirovan diparêzin çima li dijî van êrişan bêdengin. Li wir zarok têne kuştin, jin tên kuştin. Gelek kes koçber bûn. Yên mafê mirovan diparêzin bila li vî şerî temaşe nekin. Daxwaza me ji wan û hemû kesan ew ê ku li dijî vî şerî bisekinin û edî şerê li ser welatê me bi dawî bibe.”
‘Em vî şerê li ser axa xwe qebûl nakin’
Emîne Alkiş jî bertek nîşanî bêdengiya dewletên navneteweyî da û wiha got: “Em naxwazin zarokên me bên kuştin. Em vî şerê li ser axa xwe qebûl nakin. Divê hemû dayik li dijî vî şerî rabin ser pîyan.”
Daxuyanî bi dirûşmeyên “Jin jiyan azadî” bi dawî bû.
Dayikên Aştiyê li navçeya Cizîrê jî li ber avahiya DEM Partî ya navçyê daxuyanî da. Rêxistinên DBP û DEM Partî yên navçeyê, parlamentera DEM Partî ya Şirnexê Newroz Uysal Aslan û gelek kes tevlî daxuyaniyê bûn. Di daxuyaniyê de berdevka dayikên Aştiyê Ayşe Baytûr axiv û got: “Li ser gelên Rojava û Suriyeyê êrişên dijwar pêk tên. Rojava dilê Kurdistanê ye. Divê hemû kes li dijî van êrişan rabin li ser pêyan. Em weke Dayikên Aştiyê divê edî bila şer bi dawî bibe û aştiyek pêk were.”
Daxuyanî bi dirûşmeyên, “Bijî aştî” bi dawî bû.
Wan
Li Wanê jî di pêşengiya Meclisa Dayikên Aştiyê de nûnerên saziyên civakî û siyasî bi heman armancê daxuyanî dan. Meclîsa Dayikên Aştiyê li pêş rêxistina DBPê ya Wanê daxûyanî da. Girseyê panqarta “Bi ruhê Kobanê em ê Rojava biparêzin” vekirin û dirûşmeyên “Bijî berxwedana rojava”, “Bijî berxwedana gelê kurd” berzkirin. Parlementerên DEM Partiyê Gulcan Kaçmaz Sayyigît û Zulkîf Ûçar, nûnerên DEM Partî û DBPê aktîvîstên Tevgera Jinên Azad(TJA) û gelek welatî beşdarî daxuyaniyê bûn.
Li ser navê Meclîsa Dayikên Aşitiyê ya Wanê, Zekiye Kaya axivî. Zekîye Kaya êrişên li ser rojavayê şermezar kir û wiha got: “Çi karê Devleta Tirk li Rojava heye. Çima zilmê li gelan dike. Em her tim aştiyê dixwazin. Em li vir bang hemû devletan û rayedaran dikin. Demildest vî şerî bi dawî bikin”
Pişt re Rabia Algor, berxwedana rojava silav kir û got: “Rojava ne axa Devleta Tirk û DAIŞê ye. Welatê Kurdan e. Bila hemû devlet çavên xwe vekin û li me mêze bikin. Bila zanibin ku me tu carî zulma wan devletan qebûl nekir û em tu carî jî qebûl nakin. Bila hemû kes rabin li ser piyan. Em ê her tim li berxwe bidin.”
