Amed-KASED dê di serdema nû de bi gelek xebatên çandî û hunerî derdikeve pêşberî gel. Endama KASEDê Neşe Toprak da zanîn ku gava jin tên KASEDê, pir kêfxweş û kelecan dibin ku qadek tenê ji bo wan hatiye avakirin û wiha got: “Di heman demê de em dixwazin zarokên Amedê her dem werin KASEDê.”
Komeleya Çand, Huner û Wêjeyê ya Jinan (KASED) di sala 2019an de bi dirûşma “Huner ji bo her kesî ye” ji aliye komek hunermendên jin ve li Amedê hate avakirin. KASED, bi armanca pêşxistina çand, huner û parastina zimanê dayikê hat vekirin. KASED li avahiya xwe ya navçeya Sûrê ya Amedê xebatên xwe bênavber dimeşîne. Di serdema nû de kursên KASEDê yên hunerî dê berdewam bikin. Her wiha KASED dê di 13,14 û 15ê Cotmehê de bi hevkariya Şaredariya Farqînê beşdarî Festîvala Jinan bibe. Di 23, 24 û 25ê Cotmehê de jî dê wekî Koma Muzîkê ya KASEDê beşdarî Festîvala Keda Jinan ya Şaredariya Peyasê bibe.
Endama KASEDê Neşe Toprak derbarê xebatên KASEDê yên hunerî û çandî yên serdema nû de ji ajansa me re axivî.
‘Qeydên heyama nû ji bo kargeh û kursan dest pê dikin’
Neşe Toprak anî ziman ku KASED heft sal in ji bo jin û zarokan kar û xebatên pir girîng dimeşîne û da zanîn ku mîsyona KASEDê ew e ku ji bo jinan qadekê veke, çand û hunera Kurdî pêş bixe, zimanê Kurdî biparêze û wiha got: “KASED her sal festîvalên xwe pêk tîne. Di salên dawî de û par em hem bi Şaredariya Sûrê re, hem bi Şaredariya Peyasê re û hem jî bi Şaredariya Bajarê Mezin re di nava hevkariyê de bûn. Di heyama havînê de KASEDê sê mehan xebatên xwe yên hunerî meşandin û ji bo jin û zarokan kargeh çêkirin. Di beşa muzîkê, beşa wêneyê û beşa amûran de ku di nav de piyano, erbane û sêtar hene mamosteyên me yên muzîk û wêneyê kursên havînê ji bo zarok û jinan pêk anîn. Niha ev kurs bi dawî bûn û qeydên heyama nû ji bo van kargeh û kursan dest pê dikin. Kursên me her dem berdewam dikin. Ji bilî van, projeyên KASEDê yên girîng hene. Di van salên dawî de projeyên xurt ên mîna nasandina cil û bergên çandî û konser hatin çêkirin. Di beşa muzîkê de komek, di beşa govendê de komek hat avakirin û bi navê KASED-JINê di pir festîvalan de cih girtin.”
‘Em ê wek Koma Muzîkê ya KASEDê konserekê pêşkêş bikin’
Neşe Toprak da zanîn ku di qonaxa li pêşiya wan de hem kursên wan dê berdewam dikin, hem ji bo jinan kargehên hunerî dê dest pê dikin û hem jî dê tev li festîvalan bibin û wiha domand: “Festîvala Govendê heye ku em ê bi Komeleya Çand û Hunerê ya Dîcleyê re bi rê ve bibin û amadekariyên me hene. Di heman demê de di 13, 14 û 15ê Cotmehê de em ê bi Şaredariya Farqînê re beşdarî Festîvala Keda Jinan bibin ku di vê hêlê de nasîn û pêşkêşkirina cil û bergan pir tê xwestin û KASED amadekariya wê dike. Piştî wê jî di 23, 24 û 25ê Cotmehê de Şaredariya Peyasê ku sê sal in Festîvala Keda Jinan çêdike, KASED di vê hêlê de piştgiriyê dide û wekî Koma Muzîkê ya KASEDê em ê konserekê pêşkêş bikin. KASED, pir şaredariyan re alîkar dibe û xebatên pir xweş û xurt çêdike.”
‘KASED gihiştiye armanca xwe’
Her wiha Neşe Toprakê da zanîn ku dema KASED hatiye avakirin dîtine ku di warê xebatên çand û hunerî yên ji bo jinnan de kêmasî hene û diyar kir ku armanca wan ew bû ku qadeke jin bikaribin tê de azad bifikirin û di alliyê çand û hunera Kurdî de xwe pêş bixin avabikin û axaftina xwe bi van gotinan bi dawî kir: “Gava jin tên KASEDê, pir kêfxweş dibin ku qadeke tenê ji bo wan hatiye avakirin heye û kelecaneke mezin nîşan didin. Kursiyerên me pir kêfxweş in. Her çend kargeh carna demkî bin jî, kursiyerên me yên demdirêj bi me re ne, dixwazin di vê hêlê de xwe pêş bixin û bi me re bixebitin. Îro ne tenê li Kurdistanê, li Ewropayê jî KASED pir tê naskirin û meraq dikin ka em kî ne, çi dikin û çawa ji bo jinan xebatên serkeftî û girîng dimeşînin. Gava heyet tên Amedê, dixwazin KASEDê bibînin û karên hevpar bi me re bimeşînin. Di vê hêlê de em dibînin ku gihiştiye armanca xwe. Şiyara me her dem ew bû ‘Bila jin werin, di vê qadê de cih bigirin û di warê hunerî de xwe pêş bixin.’ Deriyê me ji wan re vekirî ye. Di heman demê de em dixwazin zarokên Kurdistanê û zarokên Amedê her dem werin KASEDê û bi çand û hunera xwe di vê qadê de xwe pêş bixin.”
