Amed – Bîranîna şehîdên Tevgera Azadiyê yên Amedê di roja sêyemîn de didome. Kesên ku tev li merasîma bîranînê bûn hestên xwe ji ajansa me re parve kirin û wiha gotin: “Ji bo ku aştiyeke mayînde ava bibe divê hemû alî bi berpirsiyarî nêzî pêvajoyê bibin û daxwaza gel a ji bo jiyaneke bi aramî bibihîzin.”
Di pêşengtiya Komeleya Yekîtî Çand Piştevanî û Alîkariyê ya bi Malbatên ku di Dergûşa Şaristaniyê de Xizmên Xwe Winda Kirine re (MEBYA-DER) ya Amedê de ji bo cangoriyên Tevgera Azadiyê ya Kurd ên di dîrokên cuda de jiyana xwe ji dest dane, li eywana dawetê ya Geterler a li navçeya Rezan a Amedê bernameya bîranînê tê lidarxistin. Bernameya bîranînê di roja sêyemîn de berdewam dike. Di bîranîna ku hate lidarxistin de malbatên şehîdan li ber wêneyên cangoriya rûniştin, sersaxî qebûl kirin. Bi hezaran kes tev li bîranîna cangoriyan bûn û bi hevkariyeke kolektîf bîranîn meşandin û bûn şirîkê şîn û hestên malbatan.
Welatiyên ku tev li merasîmê bûn daxwaz û hestên xwe ji ajansa me re parve kirin.
‘Pêdiviya me bi yekîtiyê heye’
Welatiyan bal kişand ser bihabûna bedela ku di vê rêyê de hatiye danîn û anîn ziman ku êdî daxwaza wan a herî mezin aştiyeke bi rûmet, edalet û rawestandina her êş û xwînê ye. Welatiyan destnîşan kir ku şehîd rûmeta hevpar a hemû civakê ne û wiha gotin: “Pêdiviya me ya herî mezin bi yekîtî û piştevaniyê heye. Ji bo ku aştiyeke mayînde ava bibe û tu malbat êşên nû nebîne, divê hemû alî bi berpirsiyarî nêzî pêvajoyê bibin û daxwaza gel a ji bo jiyaneke bi aram bibihîzin.”
‘Şehîdên me ji bo me canê xwe feda kirine’
Her wiha welatiyan anîn ziman ku şehîdên Tevgera Azadiyê rûmeta wan in û diyar kirin ku divê gel xwedî şehîdan derbikeve û ev tişt gotin: “Divê Amed rabe, xwedî li şehîdên xwe derkeve. Şehîd ne şehîdên malbatê tenê ne. Şehîd ê tevahiya civakê ne. Şehîdan, ji bo dayika xwe, ji bo bavê xwe, xwişk û birayên xwe, malbata xwe canê xwe feda nekiriye. Şehîdên me ji bo me canê xwe feda kirine.”
