Endamên Sekreteryaya Înisiyatîfa Yekitiya Demokratîk Rûmeysa Gulmez û Omer Şaybak derheqê girîngiya înîsiyatîfê û kar û xebatên înisiyatîfê axivîn û wiha gotin: “Yekitiya Kurdan wekî nan û av pêwîst e û Înisiyatîfa Yekitiya Demokratîk dîplomasiya naxweyî ya Kurdan e.”
Piştî dizaynkirina Rojhilata Navîn û Kurdistanê, di nava Kurdan de bêtifaqî derket asta herî jor û ev bêtifaqî bû sedema parçebûna Kurdistanê. Heta roja îro jî bandora vê bêtafiqiyê li ser 4 milên Kurdistanê dibe sedema windakirina destkeftiyan. Li dijî vê yekê li bakurê Kurdistanê Înisiyatîfa Yekitiya Demokratîk di gulana 2025an de li Amedê bi armanca avakirina yekitiya neteweyî hate îlankirin. Înîsiyatîf ji wê rojê ve li hemû bajarên ku Kurd lê dijîn xebatên yekitiyê û tifaqiyê dimeşîne û hewl dide xwe bigehîne hemû beşên civakê.
Endamên Sekreteryaya Înisiyatîfa Yekitiya Demokratîk Omer Şaybak û Rûmeysa Gulmez têkildarî xebatên înÎsiyatîfê axivîn û bal kişand ser girîngiya yekitiya neteweyî.
‘Yekitî ferz e’
Omer Şaybak derbarê armanca înisiyatîfê de diyar kir ku bi salan e Kurd berdêlên mezin ên bêtifaqiyê didin.
Omer Şaybak gazindeyên Ehmedê Xanî yên li ser bêtifaqbûna Kurdan anî ziman û pîvana tifaqbûnê bi vî awayî eşkere kir: “Heta niha miletek tune ku ne yek be û bi vê biserbikeve. Her wiha miletek tune ku yekitiya xwe avakiribe û serkeftî nebû ye. Miletek çiqas gel hev be û çiqas hêja be jî lê ku yekitî di nava wan de tune be ne mûmkin e bibe xwedî statûyek. Îro wekî nan û av, wekî îbadetekî ji bo me bûye ferz ku em bibin yek da ku em bikaribin azadî û mafên xwe dest bixin û xwe bi dinyayê bidin nasandin.”
Peymana Medîneyê
Omer Şaybak da diyarkirin ku ev înîsiyatîf ne di bin nasnameyeke partiyekî de, bi awayek pirrengî hatiye avakirin û bi şêweya Peymana Medîneyê tevdigerin û ev tişt anî ziman: “Her kesek, bawerî, fikr û ramanên wan çi bibe bila bibe heke xwedî hişmendiyek azadîxwaz û aştîxwaz be, Kurd û Kurdistanî be kirdeya hevpar a yekitiyê ye. Armanca me ev e ku hemû partî û saziyên li ser axa Kurdistanê yên ku siyaseta xwe dikin di nav vê înîsiyatîfê de bi cih bigirin. Di dîrokê de mînaka herî berbiçav ya yekitiyê Peymana Medîneyê ye. Dema Hz. Mihemed (s.a.v.) diçe Medîneyê li gel hemû nûnerên baweriyan, Yahudiyan, Xirîstiyanan, Mecusiyan, eşîran û keseyetan têkilî didanî ku li Medîneyê jiyaneke azad û aramî bê jiyîn. Me jî ev peyman ji bo xwe kir mînak em li ser axa Kurdistanê bibin sîwana hemû partî, sazî, civatên sivîl û keseyatan.”
Xebatên înîsiyatîfê û pêvajo
Rûmeysa Gulmez jî derheqê pêvajoyê de axivî û bal kişand ser bandora pêvajoyê ya li ser xebatên wan.
Rûmeysa Gulmez destnîşan kir ku pêvajoyê hinek derfetên wan berfireh kiriye û derbarê vê mijarê wiha axivî: “Îlankirina înisiyatîfa me û çek şewitandin di heman wextê de çêbûn, her çiqas ev tişt bi plansazî nebe jî pêvajoya aştiyê pêşiya însiyatîfa me vekir da ku peywîra xwe bîne cih. Pirsgirêkên di nava Kurdan de ne tenê girêdayê nakokiyên Kurdan e. Kurd bi yek dengî ji aliyê aştiyê û demokrasiyê ve yek in.”
‘Înisiyatîf ne tenê herêmkî ye’
Her wiha Rûmeysa Gulmez diyar kir ku ew dawiya her heyvê kom dibin û li gorî xebatên xwe plansazî çêdikin û bal kişand ser berfirehiya xebatên înisiyatifê ku ne tenê herêmkî ye û axaftina xwe wiha bi dawî kir: “Înisiyatîf li Bakur hatiye avakirin lê ji bo hemû Kurdên cîhanê berpisyar e. Li Bakur, Başûr, Rojava û Rojhilat, li kuderê pirsgirêkek Kurdan hebe înîsiyatîf vê pirsgirêkê wekî barê xwe dibîne û ji bo çareseriyê tevdigere. Înisiyatîfa Yekitiya Demokratîk em dikarin bibêjin dîplomasiya nav Kurdan e, ji xwe di nava înîsiyatîfê de komîsyona dîplomasiyê jî heye.”
