Hevserok Giştî yê DBPê Keskîn Bayindir di civînên ku li navçeyên Çingîfê, Qale û Şahînbeyê hatin lidarxistin de axivî û got: “Ji bo ku careke din çek neyên bikaranîn vegera gerîlayan a malên wan were misogerkirin, gavên qanûnî bên avêtin.”
Hevserokê Giştî yê DBPê Keskîn Bayindir û şandeya pê re bi dirûşma “Em gotina aştiyê bi gel re ava dikin” de li navend û gundên Dîlokê civînên gel û rêze çalakiyên xwe berdewam dikin. Heyeta DBPê ku Hevserokê Giştî Keskin Bayindir jî di nav de bû, di roja duyemîn a bernameyê de ewilî çû taxa Amarayê yê navçeya Çingîfê, di civîna li gund de ku welatiyên Tirkmen jî bi giranî beşdar bûn, Pêvajoya Aştî û Civaka Demokratîk hat nîqaşkirin û welatiyan derbarê qonaxa pêvajoyê û derxistina qanûna çarçoveyê de pirsên xwe arasteyî heyetê kirin.
‘Pêvajoya aştiyê ji bo hemû gelan e’
Hevserokê Giştî yê DBPê Keskin Bayindir di civînê de axivî û bal kişand ser girîngiya pêvajoyê û wiha got: “Pêvajoya aştiyê ya ku ji aliyê Rêberê Gelê Kurd Abdullah Ocalan ve hatiye destpêkirin, ne tenê ji bo Kurdan, ji bo Tirkmen, Ereb, Tirk û hemû gelan e. Ev pêvajo ji bo bingeha jiyana hevpar a nasname, bawerî û pêkhateyên cuda hat destpêkirin. Ji bo serkeftina vê pêvajoyê, divê em aliyê xwe aşkere bikin û têkoşîna xwe mezin bikin.”
‘Ji bo avakirina civaka demokratîk gavên nû werin avêtin’
Keskîn Bayindir li ser pirsa welatiyan a “Gelo bi derketina qanûna çarçoveyê re her tişt diqede?” wiha bersiv da: “Ev qanûn destpêk in. Ji bo avakirina aşitiyê divê berî her tiştî şer û pevçûn bi temamî rawestin. Ji bo vê jî divê girtiyên azadiyê yên di zindanan de werin berdan. Astengiyên li pêşiya vegera mirovên me yên ku ji ber dozên siyasî çûne sirgûnê werin rakirin û ji bo ku careke din çek neyên bikaranîn vegera gerîlayan a malên wan were misogerkirin. Piştî van gavan, divê bi guhertinên makezagonî re ji bo avakirina civaka demokratîk gavên nû werin avêtin.”
Di civînê de welatiyekî 70 salî jî bal kişand ser rola jin û ciwanan û ev tişt got: “Gotine ‘daristan şewitiye’ ji bo vemirandina vî agirî şiyarbûna çend kesan têrê nake. Divê yên şiyar bûne, yên razayî jî hişyar bikin. Kêmasiya me ya herî mezin a di vê pêvajoyê de nebûna jin û ciwanan e. Em dikarin bi pêşengiya jin û ciwanan vê pêvajoyê bi ser bixînin.”
Welatiyekî din jî destnîşan kir ku divê li dijî provokasyonan eniyeke yekbûyî ya hêzên demokrasiyê were avakirin û çavdêriya pêvajoyê li her qadê were kirin.
Heyeta DBPê piştî gundê Amarayê, derbasî gundê Nûrgûcûkê yê navçeya Qaleyê bû. Li vê derê jî Keskîn Bayindir agahî dan gel û guh da pirs û fikarên wan.
Li ser pirsa welatiyekî ya ku got, “Li vê erdnîgariyê li binê her dar û kevirî canekî bêkefen heye, dê rewşa wan di pêvajoya nû de bibe çi?” Bayindir wiha bersiv da: “Em ne li cîhanê û ne jî li vir ji sifirê dest pê nakin. Em tu carî raboriyê jê nabin û ji bîr nakin. Gelê me li her derê dibêje ku ew ewlehiyê bi dewletê nayîne. Mafdar e jî, ji ber ku hafizaya wî zindî ye û êşên wî nû ne. Ji ber vê yekê, pêvajoyên aşitiyê ne pêvajoyên jêbirina raboriyê ne; berovajî vê, pêvajoyên bîranîn û rûbirûbûna bi raboriyê re ne. Pêvajoya axaftina li ser rêgirtina li êşên nû ye.”
Li Şahînbeyê dirûşma ‘Jin jiyan azadî’ deng veda
Heyetê piştî bernameya gundan, berê xwe da taxa Malazgirtê ya navçeya Şahinbeyê ya li navenda Dîlokê. Civîna li vê derê veguherî şahiyekê û gel bi giranî tevlî govendê bû. Di civîna ku jin û ciwan tê de li pêş bûn de, dirûşma “Jin, jiyan, azadî” hatin berzkirin.
Keskîn Bayindir li vir bang li girseyê kir û diyar kir ku ew di qonaxeke pir krîtîk de ne û wiha got: “Ev pêvajo ji aliyê Rêberê Gelê Kurd Abdullah Ocalan ve tê meşandin û gihîştiye qonaxekê. Ji bo vê yekê berpirsyariyeke mezin dikevin ser milê me. Divê em di her qada jiyanê de têkoşîna aşitiyê mezin bikin da ku destê Birêz Ocalan li ser maseya muzakereyê bihêz bibe. Gava em têkoşînê mezin bikin, dê dewlet jî neçar bibe gavan baveje.”
Civîna gel piştî axaftinan bi gerandina govendê bi dawî bû
