Şandeya DBPê ya ku li navçeyên Îslahiye û Keferdîzê bi karkerên çandiniyê û welatiyan re hat cem hev, diyar kir ku ji sala 1993yan vir ve bi awayekî fermî 8 pêvajo qewimîn lê çareser ne bûn û wiha gotin: “Bi Pêvajoya Aştî û Civaka Demokratîk re em êdî dixwazin vê pêvajoyê temam bikin.”
Civînên gel ên ku DBP bi dirûşma “Em aştiyê bi gelan re ava dikin” li dar dixe, li Dîlokê berdewam dikin. Hevserokê Giştî yê DBP’ê Keskin Bayindir jî beşdarî civînên gel ên li Dîlokê bû. Şandeya DBPê di çarçoveya bernameyê de ewilî karkerên çandiniyê yên li herêma gundewarî ya navçeya Keferdîzê ziyaret kir. Şandeya ku bi karkerên çandiniyê yên ji bajarên cuda yên Kurdistanê hatine re hat cem hev, derbarê Pêvajoya Civaka Demokratîk û Aştiyê de agahî dan. Şandeyê guh da daxwazên karkeran û qala xêra ku pêvajoya aştiyê dê bide aboriya welat kir.
‘Ev pêvajo naşibe pêvajoyên din’
Piştî civîna karkeran, şande derbasî Taxa Zêtinliya Zêr a gundewar a navçeya Îslahiyeyê bû. Keskîn Bayindir ê di civîna gel de axivî û got: “Demeke dirêj e em van civînên gel didomînin. Em bi gelên xwe re qala aştiyê dikin. Bi taybetî em qala Pêvajoya Aştî û Civaka Demokratîk a ku ev sal û nîvek e berdewam dike, dikin. Ev pêvajo naşibe pêvajoyên din. Ji bo çareseriya pirsgrêka Kurd ji sala 1993yan vir ve bi awayekî fermî 8 pêvajo bi dewletê re qewimîn, lê tu carî çareseriyek çênebû. Bi Pêvajoya Aştî û Civaka Demokratîk re em êdî dixwazin vê pêvajoyê temam bikin.”
‘Dewlet li hemberî pêvajoya dîrokî gav navêje’
Keskîn Bayindir di berdewamiya axaftina xwe de anî ziman ku mînaka vê pêvajoyê li cîhanê tune ye û wiha pê de çû: “Dema em li kalîteya gavên di çarçoveya pêvajoyê de hatine avêtin dinêrin, di cîhanê de tu mînakek vê tune ye. Ji Îspanyayê bigire heta Îngilîstanê, ji Hindistanê heta Amerîkaya Latîn, gelek gelên li cîhanê pirsgrêkên xwe çareser kirin. Em jî dixwazin pirsgrêka Kurd bi diyalogê çareser bikin. Her kesî dît ku pirsgrêka Kurd êdî bi çek, şer, înkar û asîmîlasyonê çareser nabe û nayê çareserkirin. Ji bo vê yekê merasîma şewitandina çekan pir girîng bû. Nîşandana niyeta baş bû. Ev yek ji tevahiya cîhanê re hat ragihandin. Her kesî ev yek pir baş pêşwazî kir û piştgirî da. Heta niha bersiveke ku li gorî van gavên dîrokî be, nehatiye dayîn.”
Piştî axaftina Keskîn Bayindir welatiyan pirsên xwe kirin û anîn ziman ku ew ji siyaseta xapandinê ya dewletê westiyane. Welatiyan destnîşan kir ku divê gavên ji bo aştiyê tên avêtin bêbersiv nemînin û piştgiriya xwe ya ji bo pêvajoyê diyar kirin.
‘Em namzetên birêvebirina Tirkiyeyê ne’
Keskîn Bayindir bersiv da welatiyên ku gotin hinek derdor derbarê Pêvajoya Aştî û Civaka Demokratîk de têgihîştina “Dê bi AKPê re tifaqa were kirin” ava dikin û wiha got: “Yên ku vê dibêjin bila li raboriya me binerin. Armanca me birêvebirina Tirkiyeyê ye, ne ku em bibin girtiyên kesî. Em ê her dem bi siyaseta xwe ve bibin bixwe.”
Şande, piştî civînê ji bo hevdîtina gel derbasî navenda Dîlokê bû.
