Aktivîsta TJAê Ayşe Gokkan ji girtîgehê nameyeke spasiyê û piştevaniyê şand û wiha got: “Ev biryar, biryardariya me ya lêgerîna heqîqet, edalet û azadiyê hîn bêtir bihêz kiriye. Ez spasî ji her kesên piştgirî dan dikim ku bûn dengê me. Piştgirî hêza me ya herî mezin e.”
Aktivîsta Tevgera Jinên Azad (TJA) Ayşe Gokkan ku bi îdîaya ‘endamtiya rêxistinê’ 19 sal û 6 meh cezayê girtîgehê lê hat birîn, ji girtîgehê nameyek ji raya giştî re şand.
Di nameya xwe de Ayşe Gokkan spasî her kesên ku piştgirî dane wê kir û diyar kir ku têkoşîna ji bo azadî, wekhevî û jiyana bi rûmet ne sûc.
Nameya Ayşe Gokkan a ku ji girtîgehê şandiyî bi vî rengî ye: “Di doza ku bi tewanbariya endamtiya rêxistinê li dijî min dihat kirin de ji aliyê dadgehê ve li hemberî min 19 sal û 6 meh cezayê girtîgehê hat birîn û biryara berdewamiya girtina min hat dayîn. Ev biryara ku hatî dayîn, baweriya me ya bi rewabûna têkoşîna ku em bi salan e di qada mafên jinan û mafên mirovan de dimeşînin nehejandiye; berevajî vê yekê, biryardariya me ya lêgerîna heqîqet, edalet û azadiyê hîn bêtir bihêz kiriye. Ji roja yekem a dozê heta danişîna biryarê, ez spasiyên xwe yên herî ji dil pêşkêşî hemû rêxistinên jinan, rêxistinên girseyî yên demokratîk, parêzvanên mafên mirovan, hiqûqnas, saziyên navdewletî yên mafên mirovan, nûnerên partiyên siyasî, kedkarên çapemeniyê û her kesê xwedî wijdan dikim ku pêvajoyê ji nêz ve şopandin; di salona danişînê de, li ber avahiya dadgehê û li her derê piştevaniya xwe nîşan dan. Ev piştevaniya bihêz a ku hatî nîşandan, bûye îfadeyeke watedar a xwedîderketina li têkoşîna jinan a ji bo wekhevî û azadiyê, mafên mirovan û daxwaza edaletê. Di vê pêvajoyê de her piştgiriyek, her peyamek hatî şandin û her dengek hatî bilindkirin, careke din nîşan da ku em ne bi tenê ne. Em dizanin têkoşîna jinan a ji bo azadî, wekhevî û jiyana bi rûmet ne sûc e. Bi vê hêviya ku piştevanî mezin dike, em ê ligel her kesên ku têkoşîna maf û azadiyê dimeşînin, mil bi mil berdewam bin. Ez spasî ji herkesên piştgirî dan dikim ku bûn dengê me û hêvî mezin kirin. Piştgirî hêza me ya herî mezin e.”
