Amed – Hunermend Xelîl Xemgîn gel vexwend Mitîngên Azadiyên yên bi daxwaza azadiya fîzîkî ya Rêberê Gelê Kurd Abdullah Ocalan ku dê li Amed, Wan, Stenbol û Mêrsînê bên lidarxistin û got: “Ji bo pêvajo pêş bikeve divê Rêber Ocalan azad be.”
Bi daxwaza azadiya Rêberê Gelê Kurd Abdullah Ocalan dê di 27ê Hezîranê de li Wan û Mêrsînê; di 28ê Hezîranê de jî li Amed û Stenbolê bi tevlîbûna hevserokên DEM Partî Partiya Herêmên Demokratîk (DBP) û Aktîvîsta Tevgera Jinên Azad (TJA) Sebahat Tuncelê Mitîngên Azadiyê bên lidarxistin. Gelek siyasetmedar, nûnerên saziyên sivîl aştîxwaz û hunermend ji bo tevlîbûna mitîngan bangawaziyê dikin.
Hunermend Xelîl Xemgîn jî bi dîmenekê ji bo tevlîbûna mitîngan bang li jin, ciwan, sazî û dezgehan, gelê Kurd û dostên Kurdan kir û got: “Banga min ji ciwan, jin, dayik û hemû dostên Kurdan e ku ji bo pêvajoyê dengê xwe bilind bikin.”
‘Rêber Ocalan dikare pêvajoyê pêş bixe’
Xelîl Xemgîn destnîşan kir ku gelê Kurd bi pêvajoya Aştî û Civaka Demokratîk hatiye asta çareseriya pirsgirêka Kurd û got: “Dinya alem her kesek azadiya Serokê me dixwaze. Gelê me ji bo çareseriyê di nav têkoşîneke mezin de ye û li ser pêyan e. Serokê me Rêber Ocalan divê azad bibe da ku pêvajoya Aştî û Civaka Demokratîk bibe serî. Tênê Rêber Ocalan dikare vê pêvajoyê pêş bixe. Ez nikarim li gel we bim lê bi dilê xwe û rûhê xwe ve li cem we me. Ez baş dizanim ku hûn ê li şûna min Çerxa Şoreşê bistrên û hemû qadên mitîngan bihejînin. Bijî Azadî, bijî civaka demokratîk.”
