Komeleya Wêjekarên Kurd bi navê ‘Ziman û Wêjeya Kurdî’ panelek li darxist û di panelê de hat destnîşankirin ku divê bê statuya Zimanê Kurdî neyê qebûlkirin û hat diyarkirin ku divê her der qad bibe Kurdî
Komeleya Wêjekarên Kurd li Parka Weqfê ya girêdayî taxa Paşakoşkê ya Meletiyê bi navê ‘Ziman û Wêjeya Kurdî’ panelek li dar xist. Rêxistina DEM Partiyê ya Meletiyê, Komeleya Elewiyên Demokratîk (DAD) û saziyên demokratîk tev li panelê bûn.
Panela ku di moderatoriya helbestan Alî Şûkran Akgok de hat meşandin, nivîskar Hecî Ozkal li ser ‘Duh, îro û sibê ya Kurdî’, Nivîskar Mîne Acer li ser ‘Têkiliya Dayik û Ziman’ û Nivîskar Mehmet Şahîn jî li ser ‘Ziman û Wêje’yê axivîn.
Nivîskar Mina Acer di panelê de li ser girîngiya zimanê dayikê û rola jinan a di parastina wêjeyê de axivî û destnîşan kir ku mal, dayik û bav bingeha parastina ziman in û wiha got: “Zarok hê di zikê dayika xwe de dest bi naskirina cîhanê dike. Dengê yekem ê ku dibîhîze, ritm û dengê dayikê ye. Ji ber wê, dayik ne tenê zarokek tîne dinyayê, di heman demê de zimanekî, çandekê û nêrînekê jî tîne dinyayê. Çand, huner, dîrok û bîra gelekî di sînga dayikan de tê parastin û heta ku dayik bi wî zimanî biaxivin, ew ziman zindî ye.”
Metirsiyên Modernîzm û Asîmîlasyonê
Mîne Acer bal kişand ser metirsiyên li ser zimanê dayikê û got ku îro ev têkiliya pîroz di bin xetereyê de ye û ev tişt anî ziman: “Bi bandora modernîzmê û pergalên asîmîlasyonê, sînorên me û malên me bê ziman dimînin. Heke em dixwazin zimanê me bijî, divê em bizivirînin ser koka xwe. Parastina zimanê dayikê ne tenê karê zimannas an nivîskaran e, ew berî her tiştî karê malê ye, karê dayik û bavan e.”
‘Bêstatubûn nayê qebûlkirin’
Nivîskar Hecî Ozkal li ser rewşa ‘duh, îro û siberoja Kurdî’ diyar kir ku Zimanê Kurdî zimanekî pir dewlemend û wêjeyî ye û wiha got: “Îro li hember ewqas zext û zordariyê, bê statûbûnê, Zimanê Kurdî li ber xwe dide û li ser piyan e. Lê divê bêstatubûna Zimanê Kurdî neyê qebûlkirin û her der bibe qada Kurdî.”
‘Ziman bê wêje bê ruh e’
Nivîskar Mehmet Şahin jî li ser têkiliya zaman û wêje rawestiya û bi lêv kir ku ziman hebûna mirovan e û ev nirxandin kir: “Ziman bê wêje bê ruh e. Wêje asoyên zimên xurttir û dewlemendtir dike. Ê ku ziman dike ziman wêje ye. Di hemû geşedanên siyasî, civakî û şoreşê de wêje roleke pir girîng dilîze. Wêjeya kurd hem milê devkî hem jî milê nivîskî danheviyek ciddî heye. Mîrasek pir bi nirx ji me re hatiye hiştin. Li ser vê mîrasê ziman û wêjeya kurdî pêşxistin erka me ya esasî ye. Ji bo vê yekê statûya zimanê kurdî xeta me ya sor e.”
Panela Ziman û Wêjeya Kurdî bi pirs û bersivan bi dawî bû.
