Karkerên madenê piştî bi Wezareta Karên Navxwe re civiyan daxuyanî dan û gotin: “Biryarê em ê bidin, baweriya me bi rayedaran nayê.”
Karkerên madenê yên giredayî Sendîqaya Xweser a Karkerên Madenê yên ku di şîrketa madenê ya bi navê Dorukê de dixebitîn, ji bo heqdestê xwe bigirin bi Wezareta Karên Navxwe re civiyan. Karkeran piştî civînê li ber Peykera Karkerên Madenê li Cadeya Olgunlara Enqereyê daxuyanî dan. Daxuyanî ji aliye Serokê Giştî yê Sendîqaya Xweser a Karkerên Madenê Gokay Çakir û du karkeran ve hat dayîn.
‘Em ê biryarê bi hev re bidin’
Gokay Çakir diyar kir ku çend saet li gel wezaretê civiyan e û qala civînê kir û wiha got: “Em sê heval bi Wezerata Karên Navxwe û Wezerata Xebatê re civiyan. Çar kesên ji şirketê jî di civînê de amade bûn. Em ê biryara xwe piştî hevdîtina bi karkeran re bidin. Biryar wê karker bidin. Karker bibejîn em bimeşin Enqereyê em ê bimeşin. Bibêjin li vir têkoşîna xwe bidomînin, em ê li Beypazariyê bidomînin. Ji me re gotibûn ku wê di 15ê mehê de heqê me bidin me. Lê heqê me nedan ji bo vê yekê em dîsa vegeriyan Enqereyê. Em ê derdê xwe ji her kesî re bêjin.”
Piştre karkerên bi Wezaretê re hevdîtin kiribûn axivîn
‘Em ji sozên rayedaran bawer nakin’
Karkeran anî ziman ku neheqiyeke pir mezin heye û gotin:”Me çalakiya xwe piştî ku 3 wezaretan soz dabû me, bi dawî kir. Lê heqê me nedan. Neheqî li me dikin. Em ji sozên rayedaran bawer nakin. Baweriya me bi rayedaran nayê. Em ê bi hevalên xwe re biaxivin û bicivin. Heke biryar were dayîn em ê dîsa çalakiya xwe bidomînin. Em ê piştre daxuyaniyeke berfireh bidin.”
Karker piştî hevdîtinê û daxuyaniyê vegeriyan Beypazariyê.
