ANKA-DERê di çerçoveya Cejna Zimanê Kurdî de bi jin û zarokan re bernameyek li dar xist. Di bernameyê de stran hatin gotin û li ser girîngiya zimanê Kurdî gotûbêj hat kirin.
Komeleya Ziman, Çand û Hunerê ya Ankayê (ANKA-DER), di çerçoveya bernameyên 15ê Gulanê Cejna Zimanê Kurdî de li avahiya xwe ya navçeya Çankaya ya Enqereyê bi jinan re civînek li dar xist. Di bernameyê de pankarta li ser, “Jinên azad bi ziman û çanda xwe dîroka gelan diparêzin û ji nû ve ava dikin” dinivisî hat daliqandin. Bi boneya Roja Dayikan jin bi zarokên xwe ve tevlî bernameyê bûn û li ser girîngiya ziman gotûbêj kirin.
Di bernameyê de Hevseroka ANKA-DERê Ferîde Akturan axivî û Cejna Zimanê Kurdî û Roja Dayikan li jinan pîroz kir û wiha got: “Em li vir xebatên ziman dikin. Em bi hatina we pir kêfxweşin. Polên me yên zarok û mezinan jî hene. Ew der mala we ye. Ziman ji bo me hemûyan pêwistiyeke bingehîn e. Zimanê me bi sedan sal in di bin destan de ye. Divê em xwedî li zimanê xwe derbikevin.”
Piştî axaftinê zarokan danasîna peyvên Kurdî kirin û helbest xwendin. Piştre jî bername bi stranên Koma Jinên Anatoliyayê ve berdewam kir. Koma Jinên Anatoliyayê bi stranên xwe beşdaran coşandin û jinên beşdar bibûn jî demên xweş derbas kirin. Jinan di bernameyê de dirûşmeyên, “Jin jiyan azadî” berz kirin. Bername bi stranan û gerandina govendê bi dawî bû.
