Amed – Endama Sekreteryaya Platforma Yekîtiya Jinên Kurd a Bakur Sevîm Bîçîcî bal kişand ser rola jinan a di avakirina yekîtiya neteweyî de û destnîşan kir ku dê yekîtiya neteweyî kolan bi kolan ava bikin.
Platforma Yekitiya Jinên Kurd a Bakur di sala 2017an de li Amedê hate avakirin. Ji wê rojê ve her çiqas ji ber sedemên cuda navber dabe xebatên xwe jî piştî banga Rêberê Gelê Kurd Abdullah Ocalan li ser yekîtiya neteweyî ya Jinên Kurd xebatên xwe berdewam dike. Di platformê de li gorî daneyên sala 2025an 180 jin cih digirin. Yek ji wan jinan jî endama sekreteryayê ya Platforma Yekîtiya Jinên Kurd a Bakur û Hevşaredara Farqînê Sevîm Bîçîcî ye. Sevîm Bîçîcî derbarê xebatên platformê û giringiya yekîtiya neteweyî de ji ajansa me re axivî.
‘Berjewendiyên giştî hatin paşguhkirin’
Sevîm Bîçîcî anî ziman ku ji bo yekîtiya neteweyî bi salan e xebat tên meşandin û daxwaza gelê Kurd di vî warî de pir zelal e, lê belê armancên diyarkirî hêj bi tevahî pêk nehatine. Sevîm Bîçîcî sedema vê rewşê wiha nirxand: “Hişmendiya kesayetî derketiye pêş. Her wiha, hişmendiya rêxistinî, sazî û partiyên siyasî ketine pêşiya berjewendiyên giştî, ku ev yek bûye sedem ku yekîtiya gelê Kurd bi tevahî pêk neyê. Piştî ku platformê di sala 2017an de xwe eşkere kir, xebatên ku me xwest em derxînin holê bi taybetî ji aliyê saziyan û hişmendiya mêrserwer ve rastî gelek astengiyan hatin.”
Xebatên dîplomasiyê û berfirehbûna platformê
Sevîm Bîçîcî diyar kir ku tevî hemû astengiyan, wan ji hemû reng û nêrînên jinên Kurd pêkhateyek ava kiriye û ev yek anî ziman: “Nûnerên hemû olan, mirovên xwedî raman û rêxistinên cihêreng tev li xebatên me bûn. Bi 101 delegeyan koordînasyon û sekreterya hat avakirin. Serdanên Başûrê Kurdistanê çêbûn, hevdîtin hatin kirin û bi dîyasporaya Ewropayê re têkilî hatin danîn.”
‘Heke ji jêr ve neyê avakirin, ji jor ve çênabe’
Sevîm Bîçîcî da zanîn ku heke yekîtî tenê di çarçoveya partî û saziyan de bimîne û bi hişmendiya baviksalarî bê meşandin, dê têk biçe. Sevîm Bîçîcî destnîşan kir ku yekîtî divê ji nava gel dest pê bike û wiha domand: “Jin dixwazin yekîtiya neteweyî bi her awayî pêk were. Me ev raman kir armanca xwe; yekîtiya neteweyî pêwîst e kolan bi kolan bê avakirin. Em dixwazin çanda Kurdî ya hevgirtin û hezkirinê ji nû ve geş bikin. Divê ev yekîtî ji kolan, tax û navçeyan dest pê bike. Heke yekîtî ji jêr ve neyê avakirin, ji jor ve çênabe.”
‘Em ê kesên yekîtiyê asteng dikin eşkere bikin’
Sevîm Bîçîcî bal kişand ser sedsala nû û da zanîn ku ew ê di dema pêş de li hemû navçeyan xebatên xwe berfireh bikin. Sevîm Bîçîcî axaftina xwe wiha bi dawî kir: “Ev sedsal dê bibe sedsala gelê Kurd. Ji niha û pê ve, xebata me ya herî girîng eşkerekirina wan sazî û kesayetên ku li dijî yekîtiyê disekinin e. Ew kesên ku dibêjin ’em yekîtiyê dixwazin’ lê di pratîkê de astengiyan derdixin, em ê wan ji gel re eşkere bikin. Em dixwazin gel û jina Kurd, Platforma Yekîtiya Jinên Kurd a Bakur wekî mala xwe bibîne. Barê me giran e, lê me piştgiriya gel stendiye û em ê yekîtiya neteweyî ya jinan teqez pêk bînin.”
