Li Brezîlyayê rêxistinên sosyalîst, azadîparêz û civaka sivîl li hev civiyan. Tevgerên Kurd û Fîlîstînî jî beşdar bûn. Di civînê de bi taybetî têkoşîna jinên kurd berfirehî hat destgirtin û niqaşkirin.
Li bajarê Belo Horizonteyê ku paytexta eyaleta Minas Gerais a Brezîlyayê ye, bi banga Komîteya Hevgirtina bi Fîlîstînê re civîneke hevgirtinê û li dijî serdestiya dewletan hate lidarxistin. Civîn li Abîdeya Mafên Mirovan a Belo Horizonteyê pêk hat ku ev der di serdema dîktatoriya Brezîlyayê de weke navendeke îşkencekirin û girtina kesên ku li dijî dîktatoriya Brezîlyayê derdiketin, dihat bikaranîn. Cihê berbehs du salan beriya niha ji aliyê gel ve hat guhertin û bû muzexaneya berxwedana li dijî dîktatoriyê.
Li gel Komîteya Hevgirtina bi Filistînê re, Rêxistina Sosyalîst a Azadîxwaz (OSL), Tevgerên Femînîst ên Belo Horizonteyê, Kasa Invisivel, Tevgera Rêxistinbûna Gel a Minas Geraisê (MOB/MG), Enstîtuya Lêkolînên Li Ser Doza Kurd (NUPIEC), Enstîtuya Mafên Mirovan û Hevwelatîbûnê ya Helena Grecoyê (IHG), Saziya Abîdeya Mafên Mirovan û Tevgera Azadiya Kurdistanê beşdarî civînê bûn. Di civînê de mijarên; hewcedariya avakirina amûrên kolektîf ên li ser bingeha otonomî, Konfederalîzma Demokratîk a ji aliyê Rêber Apo ve hate pêşkêşkirin, demokrasî û azadî hatin gotûbêjkirin.
Endamên Komîteya Hevgirtina bi Filistînê re diyar kirin ku enternasyonalîzm pîvaneke hevpar a hemû têkoşînên civakî ye û destnîşan kirin ku fêmkirina têkoşîna gelê Kurd wê bibe alîkar ji bo pêşxistina amûrên ku têkoşînên li dijî polîtîkayên qirkirinê yên dewletan bikin yek.
Endamên Enstîtuya Mafên Mirovan û Hemwelatîbûnê ya Helena Grecoyê (IHG) jî destnîşan kirin ku Şoreşa Jinan a Rojava ronahiya hêviyê pêşkêşî tevgerên çepgir ên sedsala 21emîn dike.
Di dema civînê de belgefîlmeke li ser kampanyaya ji bo azadiya Rêberê Gelê Kurd Abdullah Ocalan tê birêvebirin, hat nîşandan.
Di dawiya civînê de jî Tevgera Azadiya Kurdistanê diyar kir ku nîqaşên li Tirkiyeyê ji ber bêtevgerî û bêdengiya dewletê bi zehmetiyên mezin pêş dikevin û destnîşan kir ku azadiya Ocalan mifteya bingehîn e ji bo destpêkirina pêvajoyeke veguhertina siyasî ya ku li ser misogeriyên pêwîst ava dibe.
