Mexmûr-Meclîsa Îştar li dijî hişmendiya qirêj a kesên nijatperest ên Tirkiyeyê ku li hemberî jinên Kurd pêşketiye, daxuyaniyek nivîskî weşand û êrîşên li ser jinên Kurd şermezar kir.
Meclîsa Îştar a Jinên Wargeha Penaberan a Şehîd Rustem Cûdî (Mexmûr) li dijî hişmendiya qirêj, gotinên zayendperest û neteweperest ên Rahmî Koç daxuyaniyek nivîskî da û xwest hemû qatil, noker û pergala mêr dewletê baş bizanibin nêzîkatiya li hemberî jinên kurd û cîhanê nêzîkatiya li rûmeta mirovahiyê û pêvanên azadiyê ye.
Meclîsê da zanîn ku ew gotinên qirêj, gemar û kîndarî yên ji aliyê kesekî bê ehlaq ê bi navê Rehmî Koç ve li dijî kesayet, nasname û rumeta jina Kurd hatî ziman, bi tundî şermezar dikin û wiha got: “Ev êrîş ne tenê daxuyaniyeke kesane ye, ev daxuyanî hişmeniya qirêj a qatilê maskekirî ye dixwazin vîna civaka azad di kesayeta jin de bişikîne. Îro li Kurdistanê û cîhanê, qatilên maskeyên ‘parêzerî’ ‘siyasetmedarî’ yan jî ‘welatparêziyê’ didin ber rûyê xwe, herî zêde êrîşî jinên Kurd dikin. Ji ber ku em baş dizanîn şoreşa Kurdistanê şoreşeke jinan e. Ew maskeyên ku li rûyê xwe dikin, rûyê wan ê kujer, faşîst û dij jin venaşêre. Kesên weke Rehmî Koç û hevalbendên wî, berhemên herî pîs ên wê sîstema qirker in, pergala xwe li ser xwîn û kedxwarîya jinan avakirine.”
‘Felsefeya Rêber Apo xeta me ya sor e’
Di daxuyaniyê de meclîsê gotina Rêberê Gelê Kurd Abdullah Ocalan ku dibêje ‘azadiya civakê di azadiya jinan de ye, jinên Kurd bi vê felsefeyê ji xweliya xwe zindî bû, bû xwedî artêş, vîn û pêşengiya mirovahiyê dike. Êrîşên li dijî jinên kurd di eslê xwe de êrîşên li dijî vê felsefeya rizgariyê ye’ bi bîr xist û got ku ew wek Meclîsa Îştarê li ser bingeha felsefeya Ocalan xwe tînin ziman û wiha pê de çû: “Felsefeya Rêber Apo xeta me ya sor e. Em bi paradîgmaya Rêber Apo ya civaka demokratîk, ekolojî û azadîxwaziya jin mezin bûn, tu hêz, tu qatil û tu zimanê qirêj nikare vê vîna azad ku di dil û mejiyê me de şîn bûye, têk bibe. Têkoşîna me dê berfirehtir bibe, bersiva me ya herî mezin ji bo van êrîşan, bilindkirina asta rêxistinbûna jinan û belavkirina felsefeya azadiyê ye.”
‘Nirxên me pîroz in’
Meclîsa Îştarê destnîşan kir ku wek jinên Kurd û civaka Kurd bêdeng namînin û ev tişt vegot: “Li hemberî her cure êrîşên zayendparêz û netewperest, em ê asta têkoşîna xwe bilintir bikin. Nirxên me pîroz in, çand, nasname û bedewiya jina Kurd bingeha avakirina jiyanek azad û wekhev e. Tu zimanê qirêj nikare sersamî li vê heqîqetê bike.”
Li dijî hişmendiya qirêj banga yekbûnê
Daxuyaniya meclîsê bi vê bangê bidawî bû: “Em bang li hemû jinên Kurdistan û cîhanê dikin ku li hemberî van kujerên qastîk ên qirêj û hişmendiya kujer bibin yek. Bila herkes bizane jinên Kurd ne bêkes in, xwedî dîrok, artêş û felsefeya birdozîya rizgariya jin in. Xeta me ya berxwedanê zelal e. Em ê tu carî rê nedin kesên weke Rehmî Koç û hevalbendên wan ên qirêj nirxên me yên netewî û zayendî bikin amûrê devê xwe yê gemar.”
