Kedkarên Amedê beriya mîtînga 1ê Gulanê li ber Şaredariya Bajarê Mezin a Amedê bernameyeke pîrozbahiyê li dar xistin. Kedkaran bang kirin ku ji bo jiyaneke wekhev û aştiyeke mayînde, sibe her kes tev li mitînga ku sibê li Qada Îstasyonê bê lidarxistin bibe.
Li ber avahiya Şaredariya Bajarê Mezin a Amedê, bi pêşengiya Serokatiya Daîreya Çavkaniyên Mirovan û Perwerdeyê, TUM BEL-SEN, TMMOB û DÎSK Genel-İşê bi boneya 1ê Gulanê Roja Karker û Kedkaran a Cîhanê bernameyeke pîrozbahiyê hate lidarxistin. Di çalakiyê de ruhê ked û piştevanî derket pêş û gelek xebatkarên şaredariyê û nûnerên sendîkayan beşdar bûn.
Kedkaran dirûşma “Bijî berxwedana karkeran” berz kirin û bi gerandina govendê 1ê Gulanê piroz kirin. Di bernameyê de li gorî wate û girîngiya 1ê Gulanê peyamên yekîtiyê hatin dayîn. Kedkarên ku li ber avahiyê kom bûn, li ber dahol û zirneyê govend gerandin. Karkeren ku tev li bernameyê bûn têkildarî 1ê Gulanê ji ajansa me re axivîn.
‘Karker, jin û ciwan werin em rêxistina xwe mezin bikin’
Kedkar Muzeyyen Sevîm, bal kişand ser taybetmendiya têkoşîna li Kurdistanê û wiha got: “Li hemû cîhanê roja têkoşîna karkeran e, lê li Kurdistanê her roja me roja têkoşînê ye. Di pêşengiya karkeran de li hemberî zilmê û sermayeyê têkoşînek heye. Di vî şerê ku li Rojhilata Navîn dimeşe de, karker herî zêde di bin zilmê de dimînin; ji ber ku heqê keda wan tev diçe wî şerî. Dewlet temamê pereyê keda me dide şer. Em bang dikin; karker, jin û ciwan werin em rêxistina xwe mezin bikin û li dijî vê zilmê bêjin ‘na’. Bila keda me û jiyana me wekhev be.”
‘Heta ev şer neqede, em ê ji aliyê aborî, tenduristî û hiqûqî ve her tim pirsgirêkan bikişînin’
Karker û Endamê Komîteya Amadekar ê mitîngê Mehmet Candar jî di axaftina xwe de bi bîr xist ku heta pirsgirêka Kurd bi rêyên demokratîk neyê çareserkirin, gelê Tirkiyeyê û Kurdistanê dê ji aliyê aboriyê ve her tim di tengasiyê de bin. Mehmet Candar bal kişand ser krîza aborî û mûçeyên ku têra debara jiyanê nakin û wiha got: “Li Tirkiyeyê ev şere 50 sal in berdewam dike û her dem dibe sedema pirsgirêkên aborî. Îro li Amedê du maaş jî têra te nakin. Çimkî kirêya malan bûne 50-60 hezar lîre. Ev pirsgirêka herî mezin a şer e. Heta ev şer neqede, em ê ji aliyê aborî, tenduristî û hiqûqî ve her tim pirsgirêkan bibînin. Piştî ev pirsgirêka gelê Kurd û civakê çareser bû, ev tişt jî dê çareser bibin.”
‘Ji bo aliyê aborî, aştî, azadiya Birêz Ocalan, em sibe li wir bin.’
Mehmet Candar di dawiya axaftina xwe de girîngiya azadiya fizikî û rola Rêberê Gelê Kurd Abdullah Ocalan a di çareseriyê de jî anî ziman û wiha dawî li axaftina xwe anî: “Hêviya me ya azadiyê heye. Birêz Ocalan berê banga kombûna girseyên mezin kiribû ji bo çareseriyê. Ji bo ku ev pirsgirêka gelê Kurd û Tirkiyeyê çareser bibe, em dengê xwe bilind dikin. Bangawaziya me ev e; ji bo aştî, azadî û mafê hêviyê yê birêz Ocalan, em ê sibe li wir bin. Em bang li gelê xwe dikin; sibê saet di 12:00an de li Qada Istasyonê werin gelhev.”
Çalakî bi gerandina govendê û berzkirina dirûşma “Bijî berxwedana karkeran” bi dawî bû.
