Wan- Amadekariyên çalakiya 1ê Gulanê Roja Ked û Piştevaniyê gihîşte asta dawiyê. Siyasetmedarên li Wanê girîngiya 1ê Gulanê vegotin û banga tevlibûnê kirin.
Amadekariyên 1ê Gulanê Roja Ked û Piştevaniyê an jî Cejna Karkeran ku ji sala 1889an ve li cîhanê tê pîrozkirin, ber bi dawiyê ve tên. 1ê Gulanê dê îsal jî li gelek navendan bi mitîng û çalakiyên cûr be cûr bê pîrozkirin. Sendîka û saziyên demokratîk ên Wanê jî dê li Qada Bajêr a girêdayî navçeya Rêya Armûşê bi çalakiyekê vê rojê pîroz bikin. Çalakî dê di saet 12.30an de bi meşekê dest pê bike û dê girse ji ber Nexweşxaneya Hayatê heta Qada Bajêr bimeşin. Amadehiyên çalakiyê gihiştiye asta dawiyê. Siyasetmedarên li Wanê jî ji bo tevlibûnê bang li gelê herêmê kir û xwestin kedxwarî bi dawî bibe.
‘Li Qada Bajêr kom bibin’
Hevşaredarê Bajarê Mezin ê Wanê Abdullah Zeydan ku qeyim tayînî şûna wî kirine, diyar kir ku dê îsal jî karker li dijî zilmê, tundiyê derbikevin qadan. Abdullah Zeydan banga tevlibûnê li welatiyan kir û daxwaz kir ku karker, ciwan, jin û hemû gelê Wanê bila roja înê saet di 13.00ê de li Qada Bajêr kom bibin.
‘1ê Gulanê ji bo me roja hêvî û aştiyê ye’
Hevserokê Partiya Herêma Demokratîk (DBP) ê Wanê Cemal Demîr jî li ser gringiya 1ê Gulanê sekinî û wiha got: “Di sala 1977an de li hemberî karkeran êrişeke pir dijwar hat kirin, 36 karkeran jiyana xwe ji dest da û bi sedan kes jî birîndar bûn. Piştî wê rojê, ev roj wekî rojeke cejnê tê pîrozkirin. Di sala 1982an de jî li vî welatî wekî rojeke fermî û betlaneyê hat qebûlkirin. Ji bo me ev roj, roja hêvî û aştiyê ye. Ji bo hevkariya karkeran em vê rojê pîroz dikin. Em ê li qada bajêr cejna karker û kedkaran bi hev re pîroz bikin. Em dixwazin gelê me jî tev li vê mitîngê bibe.”
‘Em hemû gelê xwe vedixwînin mitîngê’
Hevserokê DEM Partiyê yê Wanê Weysî Dîlekçî jî bang li Waniyan kir û got: “Ji bo jiyaneke azad û demokratîk, werin Yekê Gulanê em li qadan bin. Bi beşdarbûna hevseroka me ya giştî Tulay Hatîmogûllari û Hevserokê KESKê Ahmet Karagoz em ê meş û mîtînga Yekê Gulanê li dar bixin. Saet 13.00an de, li ber Nexweşxaneya Heyatê heta qada bajêr em ê bimeşin û li vê derê mîtînga xwe bikin. Em hemû gelê xwe, hevalên ciwan, kedkar û jinan vedixwînin mîtînga xwe.”
