Ji bo endamê ARGKê Mehmet Konûr ku 32 sal berê di şerekî li herêma Çiyayê Reşkê de jiyana xwe ji dest dabû, li navçeya Silopiyayê şîn hate danîn û şîn bi girseyî hate ziyaretkirin.
Ji bo endamê Artêşa Rizgariya Gelê Kurdistanê (ARGK) Mehmet Konur (Rizgar) ku di 17ê Tebaxa sala 1994an de li herêma Çiyayê Reşkê ya di navbera Colemêrg û Şirnexê de jiyana xwe ji dest da, piştî 32 salan li navçeya Silopiyayê ya Şirnexê şîn hate danîn. Şîn, bi pêşengtiya Komeleya Alîkarî Piştevanî Yekitî û Çandê ya Malbatên Xizmên Xwe li Dergûşa Mirovahiyê Winda Kirine re (MEBYA-DER) û bi beşdariya gelek kesan bi girseyî hate ziyaretkirin. Girseya ku li Taxa Yenîşehîrê li cihekî nêzî mala şînê kom bû, heta cihê şînê bi dirûşma “Şehîd namirin” meşiya. Hevserokê MEBYA-DERa Şirnexê Ramazan Togrûl di serdanê de axivî û diyar kir ku şîna piştî 32 salan hatiye danîn, nîşaneya xwedîderketina li nirxan e û got ew deyndarên têkoşîna azadiyê ne.
Hevseroka DEM Partiyê ya Silopiyayê Besê Cevîzê jî ji malbatê re sersaxî xwest û destnîşan kir ku dê di rêya pêşengên têkoşînê de bimeşin. Hevserokê DEM Partiyê yê Şirnexê Ramazan Ûysal jî dest nîşan kir ku pêvajoya heyî di encama têkoşîna kesên di têkoşînê de jiyana xwe ji dest dane de hatiye vê astê û wiha got: “Em ê heta dawiyê di rêya wan de bimeşin, em ê layiqî şehîdan bin û bi xurtkirina yekitiya xwe bi ser bikevin.”
‘Em soz didin ku dê hejayî wan bijîn’
Birayê Mehmet Konur Kadîr Konur jî bi lêv kir ku cangoriyan ji bo jiyaneke baştir bê jiyîn canê xwe feda kirin û wiha axivî: “Ya dikeve ser milê me ew e ku xwedî li nirxên xwe derkevin û ji bo armancên wan bixebitin. Em soz didin ku dê hêjayî wan bijîn. Em ê bi hev re vê pêvajoyê derbas bikin.”
Herî dawî jî ji bo bîranîna Mehmet Konur mewlîd hate xwendin.
