Konseya Ewlekariyê ya Neteweyên Yekbûyî li ser rewşa Sûriyeyê civîna xwe ya mehane pêk anî. Di civînê de fikarên der barê pêvajoya derbasbûnê ya qels, pêdiviyên mirovî û rîskên ji ber destwerdanên derve de hatin ziman.
Konseya Ewlekariyê ya Neteweyên Yekbûyî (KENY) roja Çarşemê ji bo nirxandina rewşa Sûriyeyê civiya. Alîkarê Nûnerê Taybet ê Sûriyeyê Claudîo Cordone ji endamên konseyê re axivî û da zanîn ku her çend agirbesta di navbera DYA û Îranê de hinekî rageşiya herêmî kêm kiribe jî, rewşa li nava Sûriyeyê hîn jî bi xetere û nediyar e.
‘Hêzên cîran serweriyê binpê dikin’
Cordone destnîşan kir ku tevgerên leşkerî yên hêzên derve û binpêkirina sînorên Sûriyeyê, aramiyê dixe xetereyê û pêvajoya başbûna siyasî û aborî zehmet dike. Cordone bal kişand ser tevgerên leşkerî yên hêzên cîran, ew bi binpêkirina xetên agirbestê tawanbar kirin û diyar kir ku ev operasyonên provokatîf serweriya Sûriyeyê û pêşketinên avakirina aştiyê têk dibin.
Banga ji bo alîkariyên mirovî
Di civînê de endamên konseyê piştgirî dan xebatên mirovî û destnîşan kirin ku divê sivîl werin parastin. Şandeyan bal kişandin ser girîngiya berdewamiya fonên alîkariyê û dan zanîn ku bi milyonan mirov koçber in, pirsgirêka xwarinê dewam dike û binesaziya welêt rûxiyaye. Nûnerê Brîtanyayê jî diyar kir ku ji bo başbûna aboriya Sûriyeyê û aramiya demdirêj, pêwîstî bi piştevaniya navneteweyî heye.
Sûriyeyê xwest êrişên derve bisekinin
Nûnertiya Sûriyeyê ya li Neteweyên Yekbûyî jî bang li KENYê kir ku ji bo rawestandina binpêkirina yekitiya axa Sûriyeyê û êrişên hêzên biyanî bi lez tevbigere. Endamên din ên konseyê jî girîngiya pêvajoyeke siyasî ya berfireh, parastina mafên mirovan û gihandina alîkariyên mirovî wekî hêmanên bingehîn ên ji bo pêvajoya Sûriyeyê destnîşan kirin.
‘Şerê herêmî dikare destkeftiyan têk bibe’
Gelek endaman hişyarî dan ku şerekî nû yê herêmî dikare Sûriyeyê bêhtir bêîstîkrar bike û pêşketinên pêvajoya derbasbûnê ku ji sala borî ve pêk hatine ji holê rake.
