Enqere – Karkerên Madenê ên ji bo heqdestê xwe û mafê xwe yê tezmînatê li pêşiya Wezareta Enerjiyê dest bi gireva birçîbûnê kiribûn hatin binçavkirin.
Karkerên Madenê yên giredayî Sendîqaya Xweser a Karkerên Madenê ne û di şîrketa madenê ya Dorukê de dixebitîn ji bo heqdestê wan nehatin dayîn ji Eskîşehîrê ber bi Enqereyê ve bi rêketin. Karkerên di roja 8emîn de gehiştine Enqereyê, xwestin ber bi Wezareta Enerjiyê ve bimeşin û li wir daxwazên xwe bînin ziman. Karker ji hêla polîsan ve hatin astengkirin. Karkerên bi meş hatine li ber avahiya Wezaretê li vir dest bi girava birçîbûnê kirin û diyar kirin ku heta daxwazên wan werin pêkanîn dê çalakiya xwe bidomînin.
110 madenvan hatin binçavkirin
Di seatên sibe de polîsan êrişî karkeran kirin û 110 karkerên madenê û rêveberên Sendîqaya Xweser a Karkerên Madenê hatin binçavkirin. Sendîqaya Xweser a Karkerên Madenê li ser hesabên xwe yên medyaya sanal ragihand ku 110 karkerên madenê hatinê binçavkirin û wiha gotin: “Em karkerên madenê ne. Bi binçavkirinan em ê paş de gav neavejin.” Her wiha hat hînbûn ku karkerekî madenê jî di dema binçavkirinê de ji ser hişê xwe çûyê û ew rakirine nexweşxaneyê.
