Hikûmeta Iraq û Hikûmeta Herêma Kurdistanê li ser yekxistina siyasî ya gumrikê û cîbicîkirina sîstema elektronîk li deriyên sînorî li hev kirin û biryar hate dayîn ku rêveberiya gumrikên Herêma Kurdistanê bi awayekê hevpar be.
Îro bi amadebûna şandeke Hikûmeta Herêma Kurdistanê 13emîn civîna Encûmena Wezarî ya Aborî ya Iraqê ji bo nîqaşkirina yek-kirina prosedûrên gumrikê hate lidarxistin.
Li gorî daxuyaniya civînê, her du alî li ser yek-kirina siyaseta gumrikê ya di navbera Iraq û Herêma Kurdistanê de, bi taybetî di warê pênasekirina gumrikê û parastina berhemên navxweyî de, li hev kirine.
Her wiha biryar hatiye dayîn ku sîstema “Asecuda” li deriyên Herêma Kurdistanê were bicîhkirin. Bi şertê ku çêkirina siyaseta gumrikê berpirsiyariya Hikûmeta Federal be û rêveberiya gumrikê bi hevbeşî di navbera her du hikûmetan de be.
Ji bo vê armancê, biryar hat dayîn ku bi şandeyeke teknîkî ya Gumrika Herêma Kurdistanê û tîma netewî ya Wezareta Darayî ya Iraqê re bicivin da ku mekanîzmayên li gorî qanûnên derbasdar ên herêmê nîqaş bikin.
Fuad Husên, ku serokatiya civînê kir, got ku Iraq ji ber rewşa şer a li herêmê bi zehmetiyên ewlehî û aborî re rûbirû ye. Ji ber vê yekê, ev gav pêwîste.
Di heman demê de, Sekreterê Desteya Wezîran ya Herêma Kurdistanê piştgiriya xwe ji bo gumrika elektronîkî nîşan da û tekezî li ser şefafî û zêdekirina dahatê kir.
Di dawiya daxuyaniyê de encûmena aborî biryar da ku deriyê sînor yê Tirêbîl wekî deriyek sînorî yê fermî ji bo hawirdekirina zêr heta ku ambargoya hewayî ya ji ber operasyonên leşkerî were rakirin, were destnîşankirin.
