Li Wan, Mûş û Colemêrgê rêya 279 gund û mezrayan ji ber berfa zêde hatine girtin.
Ji duh êvarê ve li hin bajarên herêma Serhedê û li Colemêrgê bênavber berf dibare. Ji ber barîna berfê ya zêde li Wanê rêyên 29 gund û 36 mezrayan hatine girtin. Li Mûşê bi giştî rêyên 158 gund û mezrayan, li Colemêrgê jî rêyên 15 gund û 41 mezrayan hatine girtin. Bi giştî li van her sê bajaran rêyên 279 gund û mezrayan ji ber berfê hatine girtin.
‘Adarê, heft berf li pey darê’
Wekî ku di gotineke pêşiyên Kurdan de jî dibêje; “Adarê, heft berf li pey darê” di meha Adarê de gelek caran berf dibare. Di pêvajoya Newrozê de barîna berfê bû sedem ku li hin bajaran pîrozbahiyên Newrozê jî bên taloqkirin. Ji ber berfê welatiyên herêmê bi zor û zehmetiyan re rû bi rû dimînin. Hat zanîn ku ji bo vekirina rêyên gundan xebat tên kirin.
