Rêveberiya Trump, ji bo ku pêşî li krîzeke aborî ya cîhanî û tolhildanên berfireh bigire, bang li Îsraîlê kir ku êrişên li ser binesaziya enerjî û petrolê ya Îranê rawestîne. Hat diyarkirin ku Washington dixwaze ji bo “pêvajoya piştî şer” sektora petrolê ya Îranê biparêze.
Li gorî nûçeya ku malpera Axiosê dispêre çavkaniyên payebilind, di navbera Washington û Tel Avîvê de li ser hedefên leşkerî yên li Îranê rageşiyeke tund heye. Rêveberiya Dewletên Yekbûyî yên Amerîkayê (DYA) hişyarî da Îsraîlê ku hedefgirtina rafîneyên petrolê û binesaziya enerjiyê, dê bandoreke giran li ser sivîlan bike û bibe sedema bilindbûna bihayê sotemeniyê li seranserê cîhanê.
Berjewendiyên piştî şer û tirsa ji tolhildanê
Di nûçeyê de hat destnîşankirin ku rêveberiya Trump tenê ji ber fikarên aborî vê gavê navêje. Hat îdiakirin ku DYA bi armanca “di pêşerojê de hevkariyê bi Îranê re bike”, naxwaze çavkaniyên aborî yên vî welatî bi temamî bên rûxandin. Hat diyarkirin ku eger binesaziya petrolê bê rûxandin, dê di dema “guherîna muhtemel a rejîmê” de aboriya Îranê neyê ser hişê xwe.
Li aliyê din, Washington ditirse ku Îran wekî bersiv êrişî tesîsên enerjiyê yên li welatên Kendavê bike. Ev yek jî wekî metirsiyeke mezin a ku dikare herêmê bixe nav şerekî hîn berfirehtir tê dîtin.
