Platforma Ked û Demokrasiyê ya Jinan a Êlihê bi boneya 8ê Adarê Roja Jinan a Cîhanê meş û daxuyanî li dar xist û got: “Berjewendiyên pergala baviksalariyê û sermayedariyê digihijin he.
Platforma Ked û Demokrasiyê ya Jinan a Êlihê bi boneya pîrozbahiyên 8ê Adarê Roja Jinan a Cîhanê ji Xaçereyê Dortyolê heya parka Yilmaz Guney meşiyan li dar xist û piştî meşê daxuyanî da. Di çalakiyê de Hevseroka DEM Partiyê ya Êlihê Semra Guneş, Hevseroka DBPê ya Êlihê Mehdiye Demîr, gelek endam û rêveberên partiyên siyasî, aktîvîstên Tevgera Jinên Azad (TJA) wan û gelek kes beşdarî meş û daxuyaniyê bûn.
Jinên beşdarî çalakiyan bûne bi hev re tayên ben wek keziyan por honandin û bi tayên honandî meş li dar xistin. Her wiha jinan dovîzên ku li ser “Gulistan Dokû li kurê ye”, “Rojava ne bi tenê ye”,” Peymana Stenbolê dide jiyîn”, “Bijî Berxwedana Jinan”, “Bijî yekîtî”, “Jin Jiyan Azadî”, “Keda ku nayê dîtin navê wê jin e” û “Piştgiriya bi hev re baş dike, bi hev re tê guherandin” dinivîsand hatin hilgirtin. Jinan gelek caran bê navber diruşmeyên “Jin Jiyan Azadî”, “Bijî yekiya Jinan” berz kirin. Di çalaiyê de pankarta “Jin Jiyan Azadî” hat vekirin. Metna daxuyaniyê Hevseroka Egîtîm-Senê Jale Dogan Yildiz xwend.
‘Berjewendiyên baviksalariyê û kapîtalîzmê digihîjin hev’
Jale Dogan Yildiz di destpêka axaftina xwe de diyar kir ku ew hemû jinên kedkar ên ji bo kar û azadiya xwe li ber xwe didin silav kir û wiha got: “Ji jinên Xezeyê bigire heta Rojava, ji Ûkraynayê bigire heta Îran û Afganistanê jinên di şert û mercên şer de ji bo jiyaneke baştir têdikoşin silav dikin. Berdelê hemû krîzên li cîhanê û li welatê me pêşî jin didin. Polîtîkayên neolîberal herî zêde bandorê li jinan dikin. Jin wek karkerên erzan ji bo berjewendiya sermayeyê, bi mûçeyên kêm tên xebitandin. Karê li malê wekî vebijêrk tên pêşkêşkirin. Bi gotineke din, hawîrdorek kar tê afirandin ku tê de berjewendiyên baviksalariyê û kapîtalîzmê digihîjin hev.
‘Em ji bîr nakin, nadin jibîrkirin’
Di dawiya axaftina xwe de Jale Dogan Yildiz bal kişand ser daneyên bêkariya jinan a Tirkiyeyê û got ku bêkarbûn gihîştiye ji %45an û wiha got: “Bi sed hezaran keç ji ber xizanî û nikarin pêdiviyên xwe yên bingehîn dabîn bikin. Herwiha ji derfetên xanî û xwarinê û ji mafê perwerdehiyê dûr in. Di projeyên MESEM de, 77,715 keç wekî karkerên zarok têne xebitandin. Hem wekî keda erzan û hem jî li cihên kar ên ku her cûre tacîz û îstismarê tê de heye xizmeta berjewendiyên sermayeyê dikin. Me di Meclîsê de şahidiya vê pergalê kir. Yên ku xwendekarên stajyer îstismar kirin, hatin berdan. Li gorî daneyên ÎSÎGê 13 keç ji ber nebûna tedbîrên ewlehî û tenduristiyê li cihên kar di qezayên kar de hatin kuştin. Heft karkerên ku sê ji wan zarok bûn, di şewata Ravîve Cosmetîcs a li Dîlovasiyê de ji ber ku tu tedbîr nehatibûn girtin hatin kuştin. Me ji bîr nekir û em ê ji nedin jibîrkirin. Em li dijî vê pergala ku xizanî û bêpariyê li ser me ferz dike bisekinin.”
Çalaki bi tilîlî, berzkirina dirûşmeya “Jin Jiyan Azadî” û gerandina govendê bi dawî bû.
