Aktîvîsta TJAyê Sebahat Tuncel di şahiya TJAyê ya Îzmîrê de axivî û bal kişand ser krîzên li Rojhilata Navîn û çareseriya paradîgmaya azadîxwaz a Rêberê Gelê Kurd Abdullah Ocalan û got: “Em ê bi destê xwe jiyaneke nû ava bikin û bibin pêşengên vê paradîgmayê.”
Tevgera Jinên Azad (TJA), li navçeya Bayrakli ya Îzmîrê şahiyeke jinan li dar xist. Şahî li ber avahiya rêxistina Partiya Wekhevî û Demokrasiyê ya Gelan (DEM Partî) pêk hat. Li qada şahiyê pankartên “Jin, jiyan, azadî” û “Em bi berxwedanê azad dibin û civaka demokratîk dihûnin” hatin daliqandin. Şahî bi tîlîlî û govendê dest pê kir; aktîvîsta TJA’yê Sebahat Tuncel, parlamentera DEM Partiyê ya Îzmîrê Burcugul Çubuk û gelek jin beşdar bûn.
‘Çareserî di paradîgmaya azadiya jinan de ye’
Sebahat Tuncel bal kişand ser şer û polîtîkayên li dijî jinan û wiha domand: “Em dixwazin 8ê Adarê bi coş pîroz bikin, lê li kêleka me şer heye. Li Rojava û li ser gelê me gefên ewlehiyê didomin. Her roj jin tên kuştin, ev ne qeder e. Em dixwazin jinan bidin jiyîn, loma dibêjin ‘ji şer re na’. Li Rojhilata Navîn, sînorên hatine xêzkirin û modela netewe-dewletê bûne belayê serê gelan.”
Sebahat Tuncel di berdewamiya axaftina xwe de bal kişand ser serhildana jinan a li Îranê û diyar kir ku li Îranê jinan bi dirûşma ‘Jin, jiyan, azadî’ serî hildan e û got: “Îro ne midaxeleya emperyalîst ne jî rejîmên faşîst çareserî ne. Rêya sêyemîn heye; ew jî fikriyata ‘Komara Demokratîk’ a Birêz Ocalan e. Di vê xaka rengîn de yekperestî nabe. Paradîgmaya demokratîk, ekolojîk û azadîxwaziya jinan dê bibe bersiva krîzan û em jin dê pêşengiya vê bikin.”
‘Divê jin bi xwe biryarê li ser jiyana xwe bidin’
Sebahat Tuncel destnîşan kir ku divê siyaset bi hişmendiya azadiya jinan were kirin û got: “Siyaseta ku tenê mêraniyê pîroz dibîne, pirsgirêkan çareser nake. Em di sedsala 21emîn de ne lê hîn jî jin û zarok tên qetilkirin. Em ê vê pergala ku keda jinan tune dihesibîne serûbin bikin.”
