Li gorî agahiyan rejîma Îranê 20 girtiyên siyasî ji Girtîgeha Evînê birine Girtîgeha Qizilhesarê û têkiliya wan bi malbatên wan re hatiye qutkirin.
Li gorî rapora malpera Dengê Girtiyên Kurdistan û Îranê, di nava çend rojên dawî de 20 girtiyên siyasî ji Girtîgeha Evînê bo Girtîgeha Qizilhesarê hatine veguhestin û hemû têkiliyên wan ên bi malbatên wan re hatine birîn.
‘Fikarên li ser rewşa girtiyan zêde dibin’
Di raporê de hate diyarkirin ku piştî sirgûnkirina van girtiyan, ew ji mafê axaftina bi telefonê û hevdîtina bi malbatên xwe re hatine mehrûmkirin. Birîna têkiliya bi girtiyan re fikarên derbarê rewşa tenduristî, ewlehî û şert û mercên ragirtina girtiyan de zêdetir kiriye.
Gumana hucreyên yekkesî heye
Her wiha di raporê de hate destnîşankirin ku îhtîmaleke pir mezin heye ku ev girtiyên siyasî xistibin hucreyên yekkesî. Tevî hewldan û fikarên malbatan jî, heta niha ji aliyê rayedarên girtîgehê û meqamên fermî ve derbarê rewş û aqûbeta van girtiyan de tu agahiyeke zelal nehatiye parvekirin.
