Li Myanmarê li ser hev erdhejên bi pêlên 7.7 û 6.7 pêk hatibûn. Li Myanmar û Taylandê kesên di erdhejê de jiyana xwe ji dest dan Hezar û 700 kes derbas kir. Li Myanmarê ji bo hefteyekê şîna neteweyî hate ragihandin.
Li Myanmarê rêveberiya cûnta leşkerî piştî erdheja roja Înê ku di encamê de zêdeyî Hezar û 700 kes mirin, ji roja Duşemê û pê ve ji bo hefteyekê şîna neteweyî ragihand. Di daxuyaniya artêşê de hate ragihandin ku şîn wê heta roja Yekşemê dewam bike û alên Myanmarê wê daxînin nîvî. Pispor bi fikar in ku li gel alîkariya navneteweyî jî dibe ku bi hezaran kes jiyana xwe ji dest bidin. Erdheja bi 7.7 pileyî li Myanmarê rû da û piştî wê bi çend deqeyan bi mezinahiya 6.7 pileyî erdhejeke din rû da.
Erdhejên biçûk tevahiya hefteyê li xeta Sagaingê dewam kir. Li gorî bîlançoya dawî ku roja Yekşemê hate eşkerekirin, li Myanmarê nêzî Hezar û 700 kes mirin, zêdeyî 3 hezar û 400 kes jî birîndar bûn. Li welêt hîn jî herî kêm 139 kes winda ne. Li Taylandê jî ji ber hilweşîna avahiyeke ji 30 qatî ku dihate çêkirin herî kêm 18 kesan jiyana xwe ji dest dan. Ji bo rizgarkirina mirovên di binê xirbeyê avahiyê de mane operasyon dewam dikin.
